ഏഥന്സ് : പ്രധാനമന്ത്രി നരേന്ദ്ര മോദിക്ക് ഉജ്ജ്വല സ്വീകരണമൊരുക്കി ഗ്രീസ്. മൂന്നു ദിവസത്തെ ബ്രിക്സ് ഉച്ചകോടിക്ക് ശേഷം ഗ്രീസ് പ്രധാനമന്ത്രി കുരിയാക്കോസ് മിത്സോടാക്കിസിന്റെ പ്രത്യേക ക്ഷണത്തെ തുടര്ന്നാണ് മോദി ഗ്രീസിലെത്തിയത്. പ്രധാനമന്ത്രിയുടെ ആദ്യ ഗ്രീക്ക് സന്ദര്ശനമാണിത്. മോദിയുടെ ഗ്രീസ് സന്ദര്ശനം ഇരുരാജ്യങ്ങളും തമ്മിലുള്ള സുദീര്ഘമായ സൗഹൃദം മെച്ചപ്പെടുത്തുമെന്നും സുരക്ഷ, സംസ്കാരം, വ്യാപാരം, സമ്പദ് വ്യവസ്ഥ, സാങ്കേതികവിദ്യ എന്നിവയുള്പ്പെടെ എല്ലാ സുപ്രധാന മേഖലകളെക്കുറിച്ചും ചര്ച്ച ചെയ്യുമെന്നും ഇന്ത്യയിലെ ഗ്രീക്ക് അംബാസഡര് ദിമിട്രിയോസ് ഇയോന്നൂ പറഞ്ഞു.
ഗ്രീസിലെത്തിയ പ്രധാനമന്ത്രിയെ ഗ്രീക്ക് വിദേശകാര്യ മന്ത്രി ജോര്ജ് ജെറാപെട്രിറ്റിസ് വിമാനത്താവളത്തില് സ്വീകരിച്ചു. അതിന് ശേഷം ഓള്ഡ് റോയല് പാലസിന് സമീപമുള്ള ‘ടോമ്പ് ഓഫ് അണ്നോണ് സോള്ജിയര്’ യുദ്ധ സ്മാരകത്തിലെത്തിയ മോദി പുഷ്പചക്രം അര്പ്പിക്കുകയും ഗാര്ഡ് ഓഫ് ഓര്ണര് സ്വീകരിക്കുകയും ചെയ്തു. പിന്നീട് ഗ്രീക്ക് രാഷ്ട്രപതി കാതറീനാ എന് സകല്ലാരെപോളോയുമായി പ്രധാനമന്ത്രി നരേന്ദ്രമോദി കൂടിക്കാഴ്ച നടത്തി. ഇരു രാജ്യങ്ങളും തമ്മിലുള്ള നയതന്ത്ര ബന്ധം മെച്ചപ്പെടുത്തുന്നതിന്റെ ഭാഗമായി ഗ്രീസ് പ്രധാനമന്ത്രി കുരിയാക്കോസ് മിത്സോടാക്കിസുമായി മോദി ചര്ച്ചകള് നടത്തും.
അതേസമയം, പ്രധാനമന്ത്രി നരേന്ദ്രമോദിയുടെ ആദ്യ ഗ്രീക്ക് സന്ദര്ശനത്തില് തങ്ങള്ക്ക് അതിയായ സന്തോഷമുണ്ടെന്ന് ഇന്ത്യയിലെ ഗ്രീക്ക് അംബാസഡര് ദിമിട്രിയോസ് ഇയോന്നൗ മാധ്യമങ്ങളോട് പറഞ്ഞു. “40 വര്ഷത്തിന് ശേഷം ഇതാദ്യമായാണ് ഒരു ഇന്ത്യന് പ്രധാനമന്ത്രി ഗ്രീസ് സന്ദര്ശിക്കുന്നത്. ഇതിലൂടെ ഇരു രാജ്യങ്ങളും തമ്മിലുള്ള നീണ്ട സൗഹൃദം മെച്ചപ്പെടുത്തും. സുരക്ഷ, സംസ്കാരം, വ്യാപാരം, സമ്പദ്വ്യവസ്ഥ, സാങ്കേതികവിദ്യ എന്നിവയുള്പ്പെടെ എല്ലാ സുപ്രധാന മേഖലകളിലും ഇന്ത്യയും ഗ്രീസും തമ്മിലുള്ള സഹകരണം മുന്നോട്ട് കൊണ്ടുപോകാനും സന്ദര്ശനം സഹായിക്കും. ഇതൊരു സുപ്രധാനവും സമഗ്രവുമായ പങ്കാളിത്തമാണ്. ഇന്ത്യയുടെ യൂറോപ്പിലേക്കുള്ള കവാടമാകാന് ഞങ്ങള് ആഗ്രഹിക്കുന്നു. ഇന്ത്യന് ഉല്പന്നങ്ങള്ക്ക് യൂറോപ്യന് വിപണികളിലേക്ക് പ്രവേശിക്കുന്നതിനുള്ള ഒരു കവാടമാകാന് ഗ്രീസ് തുറമുഖങ്ങള്ക്ക് കഴിയും”, അദ്ദേഹം പറഞ്ഞു. ഇന്ത്യയുടെ ചന്ദ്രയാന് നേട്ടത്തില് ഗ്രീസ് വളരെയധികം സന്തോഷിക്കുന്നുവെന്നും അഭിനന്ദിക്കുന്നുവെന്നും അദ്ദേഹം കൂട്ടിച്ചേര്ത്തു.
ഗ്രീക്ക് രാഷ്ട്രപതിക്കും പ്രധാനമന്ത്രിക്കും പുറമേ ഇരു രാജ്യങ്ങളിലെയും വ്യവസായ പ്രമുഖരുമായും നരേന്ദ്ര മോദി ചര്ച്ചകള് നടത്തും. കൂടാതെ ഗ്രീസിലെ ഇന്ത്യന് സമൂഹവുമായും അദ്ദേഹം ആശയവിനിമയം നടത്തും. മൂന്നു ദിവസത്തെ ബ്രിക്സ് ഉച്ചകോടിക്കായി ജൊഹാന്നസ്ബര്ഗിലെത്തിയ പ്രധാനമന്ത്രി ഇന്നലെ രാത്രിയാണ് ഒരു ദിവസത്തെ സന്ദര്ശനത്തിനായി ഗ്രീസിലെത്തിയത്.
Discussion about this post