തൃക്കുന്നപ്പുഴ: നാടെങ്ങും ഓണാഘോഷത്തിലേക്ക് ചുവടുവെച്ചു തുടങ്ങി. തൃക്കുന്നപ്പുഴയിലെ ഒരു സംഘം തൊഴിലുറപ്പ് തൊഴിലാളികളുടെ നൃത്തമാണ് ഓണാഘോഷത്തിന് പൊലിമയേകി സമൂഹമാദ്ധ്യമങ്ങളിൽ വൈറലായിരിക്കുന്നത്. തൊഴിലുറപ്പ് പണി ചെയ്യുന്ന വേഷത്തിൽ ഓലമടലും മൺവെട്ടിയുമൊക്കെ സംഗീത ഉപകരണങ്ങളാക്കിയാണ് ഇവരുടെ നൃത്തം.
ഒപ്പമുണ്ടായിരുന്നവരാണ് ദൃശ്യങ്ങൾ പകർത്തി സമൂഹമാദ്ധ്യമങ്ങളിലിട്ടത്. 1979 ൽ ഇറങ്ങിയ പ്രഭു എന്ന ചിത്രത്തിലെ ഇന്നീ തീരം തേടും തിരയുടെ പാട്ടിൽ എന്ന സൂപ്പർ ഹിറ്റ് ഗാനത്തിനൊപ്പമാണ് ഈ അമ്മമാർ ചുവടുവെയ്ക്കുന്നത്. പണിയായുധമായ മൺവെട്ടിയിൽ താളം പിടിച്ചും ഓലമടലും കവുങ്ങിൻ പാളയും ചെരിപ്പും ഉൾപ്പെടെ കൈയ്യിൽ കിട്ടിയതെല്ലാം സംഗീത ഉപകരണങ്ങളാക്കിയും ആയിരുന്നു നൃത്തം.
ആയിരങ്ങളാണ് ഇതിനോടകം സമൂഹമാദ്ധ്യമങ്ങളിലൂടെ ഈ വീഡിയോ കണ്ടത്. തൃക്കുന്നപ്പുഴ പഞ്ചായത്തിലെ അഞ്ചാം വാർഡിൽ വലിയ പറമ്പിന് സമീപമായിരുന്നു നൃത്തം. കുടുംബശ്രീ അംഗവും തൊഴിലുറപ്പ് തൊഴിലാളിയുമായ മണിയുടെ നേതൃത്വത്തിലായിരുന്നു അമ്മമാർ തകർത്ത് നൃത്തമാടിയത്. കസേരയിൽ സ്പീക്കറിൽ പാട്ട് പ്ലേ ചെയ്ത് അതിന് അനുസരിച്ചാണ് ചുവടുകൾ വെച്ചത്. ഇതിനൊപ്പം ഇവരുടെ വളളംകളിയും പുലികളിയുമൊക്കെ വീഡിയോകളായി സമൂഹമാദ്ധ്യമങ്ങളിൽ പലരും പോസ്റ്റ് ചെയ്തിട്ടുണ്ട്.
ഏറ്റുമാനൂർ ശ്രീകുമാറിന്റെ രചനയിൽ ശങ്കർ ഗണേഷ് സംഗീത സംവിധാനം നിർവ്വഹിച്ച ഗാനം യേശുദാസ് ആണ് ആലപിച്ചത്. പ്രേംനസീറും ജയനും ഉൾപ്പെടെ അഭിനയിച്ചു തകർത്ത സിനിമയാണിത്. സീമയുടെ നൃത്തരംഗത്തിലാണ് പാട്ട് സിനിമയിൽ ഉപയോഗിച്ചിരിക്കുന്നത്. പുതുതലമുറ കോളജുകളിലെ ആഘോഷങ്ങളിലുൾപ്പെടെ ഏറ്റെടുത്ത പാട്ട് ഈ അമ്മമാരുടെ നൃത്തത്തിൽ കൂടി ഒരിക്കൽ കൂടി വൈറലായിരിക്കുകയാണ്.
Discussion about this post