പാത മാറ്റി റോവർ; ചിത്രങ്ങൾ പുറത്തുവിട്ട് ഐഎസ്ആർഒ

ന്യൂഡൽഹി : ചന്ദ്രോപരിതലത്തിലൂടെ നീങ്ങുന്നതിനിടെ സഞ്ചാരപാതയിൽ ഗർത്തം കണ്ടെത്തിയ സാഹചര്യത്തിൽ പാത മാറ്റി പ്രഗ്യാൻ റോവർ. പുതിയ പാതയിലൂടെയാണ് ഇപ്പോൾ യാത്ര ചെയ്യുന്നത്. ആദ്യ പാതയിൽ നാല് മീറ്റർ വ്യാസത്തിലുള്ള ഗർത്തം കണ്ടെത്തിയതോടെ റോവറിനെ പിന്നോട്ട് നീക്കുകയായിരുന്നു. തുടർന്ന് തടസ്സങ്ങൾ ഇല്ലാതെയാണ് പുതിയ പാതയിലൂടെയുളള സഞ്ചാരം.

റോവറിൽ നിന്നുള്ള ദൃശ്യങ്ങളും ഐഎസ്ആർഒ പുറത്തുവിട്ടിട്ടുണ്ട്. ഇന്നലെയാണ് സഞ്ചാരപാതയിൽ ഗർത്തം കണ്ടെത്തിയത്. റോവറിൽ നിന്ന് മൂന്ന് മീറ്റർ അകലത്തിലായിരുന്നു ഗർത്തം എന്നും ഐഎസ്ആർഒ കുറിച്ചു. പുതിയ പാതയുടെ ദൃശ്യങ്ങളാണ് പങ്കുവെച്ചിരിക്കുന്നത്.

Chandrayaan-3 Mission:

On August 27, 2023, the Rover came across a 4-meter diameter crater positioned 3 meters ahead of its location.
The Rover was commanded to retrace the path.

It's now safely heading on a new path.#Chandrayaan_3#Ch3 pic.twitter.com/QfOmqDYvSF

— ISRO (@isro) August 28, 2023

ചന്ദ്രോപരിതലത്തിലെ റോവറിന്റെ പ്രവർത്തനം സെമി ഓട്ടോമാറ്റിക്കാണ്. ഗ്രൗണ്ട് സ്റ്റാഫുകളുടെ കമാൻഡ് ലഭിച്ചാൽ മാത്രമേ റോവറിന് പ്രവർത്തിക്കാൻ സാധിക്കൂ. അതേസമയം ചന്ദ്രനിലെ മണ്ണിന്റെ താപസ്വഭാവവുമായി ബന്ധപ്പെട്ട വിവരങ്ങളും ഐഎസ്ആർഒ പുറത്തുവിട്ടു. മണ്ണിന് മികച്ച താപപ്രതിരോധ ശേഷിയുണ്ടെന്ന് വ്യക്തമാക്കുന്നതാണ് വിവരങ്ങൾ.

ചന്ദ്രയാൻ മൂന്നിൻറെ ലാൻഡറിലെ നാല് പേ ലോഡകളിൽ ഒന്നായ ചാസ്‌തേ ഉപയോഗിച്ചാണ് ചന്ദ്രോപരിതലത്തിലെ മണ്ണിന്റെ താപ വ്യതിയാനങ്ങൾ പഠിക്കുന്നത്. പത്ത് പ്രത്യേക സെൻസറുകളാണ് ഈ ഉപകരണത്തിലുള്ളത്. ചന്ദ്രോപരിതലത്തിൽ നിന്ന് 80 മില്ലിമീറ്റർ താഴെ വരെയുള്ള മണ്ണിലെ താപ വ്യത്യാസമാണ് ഉപകരണം അളന്നത്. ചന്ദ്രന്റെ ഉപരിതല ഊഷ്മാവ് അൻപത് ഡിഗ്രി സെൽഷ്യസാണെങ്കിൽ, 80 മില്ലീമീറ്റർ താഴെ ഇത് മൈനസ് പത്ത് ഡിഗ്രീ സെൽഷ്യസാണെന്ന് പഠനത്തിൽ കണ്ടെത്തി.