മുംബൈ: എട്ട് പതിറ്റാണ്ടിലേറെയായി നഗരത്തിലെ സ്ഥിരം കാഴ്ചയായിരുന്ന ഡബിള്‍ ഡെക്കര്‍ ബസുകള്‍ മുംബൈയിലെ തെരുവുകളോട് വിടപറഞ്ഞു. അവസാന ദിവസമായ ഇന്നലെ ബസിനെ പൂമാലകളാല്‍ അണിയിച്ചൊരുക്കിയും യാത്ര ചെയ്യാനുമായി നിരവധി ആളുകളാണ് ഒത്തുകൂടിയത്.
“എല്ലാവരും പഴയ പോലെ ടിക്കറ്റ് എടുക്കുക. ഇന്ന് ഈ ബസിന്റെ അവസാന ദിവസമാണ്. നിങ്ങളുടെ യാത്ര അവിസ്മരണീയമാക്കുക” സീപ്സ് ബസ് ഡിപോര്‍ട്ടില്‍ നിന്ന് സര്‍വ്വീസ് ആരംഭിച്ചതിന് ശേഷം ഐക്കണിക് റെഡ് ഡബിള്‍ ഡെക്കര്‍ ബസിന്റെ മുകളിലത്തെ ഡെക്കിലുള്ള യാത്രക്കാര്‍ക്ക് ബസ് ടിക്കറ്റ് നല്‍കിക്കൊണ്ട് ബൃഹന്‍മുംബൈ ഇലക്ട്രിസിറ്റി സപ്ലൈ ആന്‍ഡ് ട്രാന്‍സ്പോര്‍ട്ട് (ബെസ്റ്റ്) ബസ് കണ്ടക്ടര്‍ ഗോപാല്‍ സുക്തേ പറഞ്ഞു. താഴത്തെ ഡെക്കില്‍ ടിക്കറ്റ് വിതരണം ചെയ്യേണ്ട അദ്ദേഹത്തിന്റെ സഹപ്രവര്‍ത്തകന്‍ സന്തോഷ് സാവന്ത് അവസാനമായി മുംബൈയുടെ തെരുവുകളിലൂടെ ഇഴഞ്ഞ് നീങ്ങുന്ന ബസില്‍ ആകാശം കണ്ടും ഓര്‍മ്മകള്‍ അയവറത്തും വെറുതെ ഇരുന്നു. അവസാന യാത്ര അവിസ്മരണീയമാക്കാന്‍ നിരവധി യാത്രക്കാര്‍ മുകള്‍ ഡക്കിലേക്ക് ഇരിപ്പുറപ്പിച്ചു.
ആധുനികവല്‍ക്കരണത്തിന്റെയും പ്രവര്‍ത്തനച്ചെലവിന്റെയും ഭാഗമായാണ് പഴയ ഡബിള്‍ ഡക്കര്‍ ബസുകള്‍ ഘട്ടം ഘട്ടമായി നിര്‍ത്തലാക്കാന്‍ ബെസ്റ്റ് അധികാരികള്‍ തീരുമാനിച്ചത്. ഇതോടെ 86 വര്‍ഷത്തെ സേവനത്തിന് ശേഷം മുംബൈയിലുടനീളം വിവിധ റൂട്ടുകളില്‍ സര്‍വീസ് നടത്തിയ ഈ പഴയ ചുവപ്പന്‍ ഡബിള്‍ ഡെക്കര്‍ ബസുകള്‍ വെള്ളിയാഴ്ച രാത്രിയോടെ ദൈനംദിന യാത്രക്കാര്‍ക്കും വിനോദസഞ്ചാരികള്‍ക്കും വിട നല്‍കി. വെള്ളിയാഴ്ച രാവിലെയാണ് ഈ നോണ്‍ എസി ഡബിള്‍ ഡെക്കര്‍ ബസുകളുടെ അവസാന സര്‍വീസ് മാറോള്‍ ഡിപ്പോയില്‍ നിന്ന് പുറപ്പെട്ടത്.
1937-ല്‍ അവതരിപ്പിച്ച ചുവന്ന ഡബിള്‍ ഡെക്കര്‍ ബസുകള്‍ നഗരത്തിന്റെ തന്നെ പര്യായമായി മാറിയിരുന്നു. മുംബൈ നഗരത്തിലെത്തുന്ന ഓരോരുത്തരുടെയും ജീവിതത്തില്‍ ഉണ്ടാകും ഒരിക്കലെങ്കിലും മുകള്‍ നിലയില്‍ ആ കാറ്റേറ്റ് സഞ്ചരിച്ച ദിവസം. ഏകദേശം 2 മണിയോടെ ബസ് സീപ്സ് ഡിപ്പോയില്‍ എത്തിയപ്പോള്‍, ബസ്സിന്റെ കൂടെ ഫോട്ടോയെടുക്കാന്‍ നിരവധി യാത്രക്കാരാണ് പരിസരത്ത് തടിച്ചുകൂടിയത്.
ഈ ബസുകള്‍ തങ്ങളുടെ ഹൃദയത്തില്‍ സൂക്ഷിച്ചിരുന്ന സവിശേഷമായ സ്ഥാനം ചിലര്‍ അനുസ്മരിച്ചു. ”ആളുകള്‍ക്ക് ഈ ബസിനെക്കുറിച്ച് ഒരുപാട് ഓര്‍മ്മകളുണ്ട്. സന്തോഷമായാലും സങ്കടമായാലും ഞങ്ങള്‍ ഇതില്‍ കയറി. ഇവിടെ എല്ലാവര്‍ക്കും ഇടമുണ്ടായിരുന്നു. മുകളിലത്തെ ഡെക്കില്‍ കാറ്റ് കൊണ്ടിരുന്ന് പുറത്തെ കാഴ്ചകള്‍ ആസ്വദിക്കുന്നത് എനിക്ക് ഏറെ ഇഷ്ടമായിരുന്നു. മുംബൈയുടെ അവശേഷിക്കുന്ന ഗൃഹാതുരത്വം കൂടി ഇല്ലാതാക്കാനുള്ള തീരുമാനം സര്‍ക്കാര്‍ പുനഃപരിശോധിക്കണം,” കഴിഞ്ഞ ആറ് പതിറ്റാണ്ടായി ഈ ഡബിള്‍ ഡെക്കര്‍ ബസുകളില്‍ യാത്ര ചെയ്യുന്ന ഗജാനന്‍ ഖമ്പാടി (71) പറഞ്ഞു.
മുന്‍പ് 900 ത്തിലധികം ബസുകള്‍ ഉണ്ടായിരുന്നു എന്നാലിന്ന് അത് ഒന്നായി ചുരുങ്ങി. കാലം മാറിയതോടെ നൂതന ഗതാഗത സംവിധാനങ്ങള്‍ ഇറക്കുന്നതിന്റെ ഭാഗമായാണ് ഇപ്പോള്‍ ഈ ബസ് സര്‍വ്വീസും നിര്‍ത്തലാക്കാന്‍ ബെസ്റ്റ് തീരുമാനിച്ചത്. എന്നാല്‍ മുംബൈ നഗരത്തിലെ അഭിമാനകരമായ ഡബിള്‍ ഡെക്കര്‍ ബസുകള്‍ ഒരു കാരണവശാലും അടച്ചിടില്ലെന്നും 2024 ജൂലൈ അവസാനത്തോടെ മുംബൈയിലെ ജനങ്ങള്‍ക്ക് പുതിയ 900 എയര്‍ കണ്ടീഷന്‍ഡ് ഡബിള്‍ ഡെക്കര്‍ ബസ് സര്‍വീസുകള്‍ നല്‍കുമെന്നും ബെസ്റ്റ് അധികൃതര്‍ അറിയിച്ചു.
ഇനി പഴയ ബസുകള്‍ക്ക് പകരം ചുവപ്പും കറുപ്പും ഉള്ള പുതിയ ഇലക്ട്രിക് ഡബിള്‍ ഡെക്കര്‍ ബസുകളാണ് മുംബൈ നഗരത്തിലെ റോഡുകളില്‍ നിറയാന്‍ പോകുന്നത്. എയര്‍ കണ്ടീഷനുള്ള 25 ഓളം ബസുകള്‍ പുതിയതായി ഇറക്കിയിട്ടുണ്ട്. ‘മുംബൈയിലെ വിവിധ മേഖലയിലെ 12 ബസ് ഡിപ്പോകളില്‍ നിന്ന് 900 എയര്‍കണ്ടീഷന്‍ ചെയ്ത ഡബിള്‍ ഡെക്കര്‍ ബസുകള്‍ നഗരത്തില്‍ സര്‍വീസ് നടത്തും. പരമാവധി ആളുകള്‍ക്ക് ഈ ബസുകളുടെ സേവനം പ്രയോജനപ്പെടുത്താന്‍ കഴിയും. മുംബൈയിലെ യാത്രക്കാരുടെ മുന്‍ഗണനകള്‍ എപ്പോഴും പരിഗണിച്ചുകൊണ്ട് ബെസ്റ്റ് ബസ് ഓപ്പറേഷന്‍ നവീകരിച്ചിട്ടുണ്ട്,” ബെസ്റ്റ് ഉദ്യോഗസ്ഥര്‍ പറഞ്ഞു.
Discussion about this post