രാജ്യത്തിന്റെ പേര് ഭാരതം എന്നാക്കി മാറ്റുന്നതിൽ എന്താണ് കുഴപ്പം എന്ന് നടി ലെന. “ചെന്നൈ, മുംബൈ, കൊൽക്കത്ത എന്നിങ്ങനെ നിരവധി സ്ഥലങ്ങളുടെ പേര് മാറ്റിയിട്ടില്ലേ. ഇന്ത്യ എന്നത് സാമ്രാജ്യത്വ ശക്തികൾ നൽകിയ പേരാണ്. ആ പേര് മാറ്റുന്നതിൽ എന്താണ് കുഴപ്പം” എന്നും ലെന ചോദിച്ചു.
ഒരു ദേശീയ മാദ്ധ്യമത്തിന് നൽകിയ അഭിമുഖത്തിലാണ് ലെന തന്റെ അഭിപ്രായം വ്യക്തമാക്കിയത്. ” ഒരു കൊളോണിയൽ ശക്തിയാണ് നമ്മുടെ രാജ്യത്തിന് ഇന്ത്യ എന്ന പേര് നൽകിയത്. നമ്മൾ നമ്മുടെ വേരുകളിലേക്ക് തിരികെ പോകണം. അതിൽ ജ്ഞാനം ഉണ്ടെന്ന് ഞാൻ വിശ്വസിക്കുന്നു. ചെന്നൈ, മുംബൈ, കൊൽക്കത്ത എന്നിങ്ങനെ നിരവധി പേരുകൾ നമ്മൾ മാറ്റിയിട്ടില്ലേ. ഭാരതത്തിന്റെ കാര്യത്തിൽ മാത്രം എന്താണ് പ്രശ്നം? നമ്മുടെ പുരാതന ഗ്രന്ഥങ്ങളും സാഹിത്യങ്ങളും അനുസരിച്ച് ഭാരതം എന്നത് വളരെ ശക്തമായ പേരാണ്” എന്നും ലെന വ്യക്തമാക്കി.
” നമ്മുടെ രാജ്യത്തിന് അമൂല്യമായ ഒരു പൈതൃകം ഉണ്ട്. നമുക്ക് നമ്മുടേതായി കാതലായ നിരവധി കാര്യങ്ങളുണ്ട്, നിരവധി ഭാഷകളുണ്ട്. അതിലൊരു പ്രധാന ഭാഷയാണ് സംസ്കൃതം. അതുപോലെ ഹിന്ദുമതവും നമ്മുടെ രാജ്യത്തെ സംബന്ധിച്ച് അവിഭാജ്യഘടകമാണ്. അത് നമ്മൾ സംരക്ഷിക്കണം. ഏതെങ്കിലും രാഷ്ട്രീയമോ മതപരമോ ആയ പ്രത്യയശാസ്ത്രത്തിന്റെ അടിസ്ഥാനത്തിലല്ല ഞാനിത് പറയുന്നത്” എന്നും ലെന വ്യക്തമാക്കി.
Discussion about this post