ചെന്നെെ: ശബരിമലയിലെ തിരക്കുകൾ സംബന്ധിച്ചുള്ള വിവാദങ്ങൾ കടുക്കുന്നതിനിടെ, വിഷയത്തിൽ പ്രതികരണവുമായി തമിഴ്നാട് മുഖ്യമന്ത്രി എംകെ സ്റ്റാലിൻ രംഗത്ത്. ശബരിമലയിലെ പ്രശ്നങ്ങൾ എത്രയും വേഗം പരിഹരിക്കണമെന്ന് സ്റ്റാലിൻ കേരളത്തോട് ആവശ്യപ്പെട്ടു. തമിഴ്നാട്ടിൽ നിന്നും വരുന്ന ശബരിമല തീർത്ഥാടകർക്ക് വേണ്ട സുരക്ഷയും അടിസ്ഥാന സൗകര്യങ്ങളും ഉറപ്പാക്കണമെന്ന് സ്റ്റാലിൻ ആവശ്യപ്പെട്ടു.
സ്റ്റാലിന്റെ നിർദേശപ്രകാരം വിഷയവുമായി ബന്ധപ്പെട്ട് തമിഴ്നാട് ചീഫ് സെക്രട്ടറി ശിവദാസ് മീണ കേരള ചീഫ് സെക്രട്ടറി വി വേണുവുമായി ഫോണിൽ ചർച്ച നടത്തി.
ശബരിമലയിൽ തീർത്ഥാടകർ അടിസ്ഥാന സൗകര്യങ്ങൾക്ക് പോലും ബുദ്ധിമുട്ടുന്നുവെന്ന വിവരത്തിന്റെ അടിസ്ഥാനത്തിലാണ് നടപടിയെന്ന് തമിഴ്നാട് സർക്കാർ വാർത്താക്കുറിപ്പിൽ വ്യക്തമാക്കി. തീർത്ഥാടകർക്ക് വേണ്ട സൗകര്യങ്ങൾ ഒരുക്കുമെന്ന് കേരള സർക്കാർ ഉറപ്പ് നൽകിയതായും വാർത്താക്കുറിപ്പിൽ പറയുന്നു. ശബരിമലയിലെ നീണ്ട വരിയിൽ നിന്നും തിരക്കിൽ പെട്ടും സേലം സ്വദേശി ഉൾപ്പെടെ ശബരിമലയിൽ മരിച്ചത് വലിയ വിമർശനങ്ങൾക്ക് കാരണമായിരുന്നു. ഇതിന് പിന്നാലെയാണ് നടപടി ആവശ്യപ്പെട്ട് സ്റ്റാലിൻ രംഗത്ത് വന്നത്.
Discussion about this post