ക്രിക്കറ്റിൽ നിന്നും വിരമിച്ചതിനു ശേഷം കൂടുതൽ സമയം സൈനിക സേവനത്തിന് . പ്ലാൻ വെളിപ്പെടുത്തി മഹേന്ദ്ര സിംഗ് ധോണി

വിരമിച്ചതിനു ശേഷം ഇന്ത്യൻ സൈന്യത്തോടൊപ്പം കൂടുതൽ സമയം ചെലവഴിക്കാനാണ് തന്റെ പ്ലാൻ എന്ന് വ്യക്തമാക്കി മഹേന്ദ്ര സിംഗ് ധോണി.

2024 ൽ മഹേന്ദ്രസിംഗ് ധോണി തന്റെ അവസാന ഐ പി എൽ സീസൺ കളിക്കുമെന്നാണ് പ്രതീക്ഷിക്കപ്പെടുന്നത്. കഴിഞ്ഞ സീസണിൽ, അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ഫൈനലിൽ ഹാർദിക് പാണ്ഡ്യയുടെ നേതൃത്വത്തിലുള്ള ഗുജറാത്ത് ടൈറ്റൻസിനെ പരാജയപ്പെടുത്തി ചെന്നൈ സൂപ്പർ കിങ്സിനെ അഞ്ചാം ഐപിഎൽ കിരീടത്തിലേക്ക് അദ്ദേഹം നയിച്ചിരുന്നു. ഇതോട് കൂടി ഏറ്റവും അധികം ഐ പി എൽ നേട്ടം എന്ന മുംബൈ ഇന്ത്യൻസിന്റെ റെക്കോർഡിനൊപ്പം ചെന്നൈ സൂപ്പർ കിങ്‌സ് എത്തിയിരുന്നു.

ഇന്ത്യൻ ടെറിട്ടോറിയൽ ആർമിയുടെ,106 പാരാ ടിഎ ബറ്റാലിയന്റെ പാരച്യൂട്ട് റെജിമെന്റിൽ ലെഫ്റ്റനന്റ് കേണൽ പദവി വഹിക്കുന്ന വ്യക്തിയാണ് ധോണി. ഒരു ക്രിക്കറ്റ് കളിക്കാരനെന്ന നിലയിൽ രാജ്യത്തിന് നൽകിയ സേവനത്തിനാണ് 2011-ൽ ഇന്ത്യൻ സൈന്യം അദ്ദേഹത്തിന് ഈ ഓണററി റാങ്ക് സമ്മാനിച്ചത്. ആഗ്ര പരിശീലന ക്യാമ്പിൽ ഇന്ത്യൻ ആർമി എയർക്രാഫ്റ്റിൽ നിന്ന് പാരച്യൂട്ട് പരിശീലനം പൂർത്തിയാക്കിയതിന് ശേഷം, 2015-ൽ അദ്ദേഹം ഒ പാരാട്രൂപ്പറായി യോഗ്യത നേടി . 2019 ഓഗസ്റ്റിൽ, ജമ്മു കശ്മീരിലെ ടെറിട്ടോറിയൽ ആർമിയിൽ അദ്ദേഹം രണ്ടാഴ്ചത്തെ സേവനം പൂർത്തിയാക്കി.

തന്റെ ചെറുപ്പകാലത്തെ ഏറ്റവും വലിയ ആഗ്രഹം ഒരിക്കലും ഒരു ക്രിക്കറ്റർ ആവുക ആയിരുന്നില്ലെന്നും മറിച്ച് ഒരു സൈനികൻ ആവുകയായിരുന്നുവെന്നും അദ്ദേഹം വ്യക്തമാക്കിയിരുന്നു. ആ ആഗ്രഹത്തിന്റെ തുടർച്ചയാണ് വിരമിച്ചതിനു ശേഷം സൈനിക സേവനം നടത്തണം എന്ന തീരുമാനത്തിലേക്ക് ധോണിയെ ഇപ്പൊ എത്തിച്ചിരിക്കുന്നത്