ന്യൂഡൽഹി : പെട്രോളോ ഡീസലോ കഴിഞ്ഞ് വഴിയിൽ പെട്ടു പോകുന്ന സമയത്ത് ഇന്ധനം തൊട്ടടുത്ത് എത്തിച്ചു തരാൻ ആരെങ്കിലും ഉണ്ടായിരുന്നെങ്കിൽ എത്ര എളുപ്പമായിരുന്നേനെ എന്ന് ചിന്തിച്ചിട്ടില്ലേ. ഇപ്പോൾ ഇന്ത്യയിൽ തരംഗം ആവാൻ ഒരുങ്ങുകയാണ് ഇത്തരത്തിൽ ഇന്ധനം ആവശ്യമുള്ള സ്ഥലത്ത് എത്തിച്ചു നൽകുന്ന ഡോർ ടു ഡോർ ഇന്ധന ഡെലിവറി സർവീസ്.
വ്യക്തികൾക്കോ രജിസ്റ്റർ ചെയ്യാത്ത മറ്റ് സ്ഥാപനങ്ങൾക്കോ ഇന്ത്യയിൽ ഇന്ധനം കൊണ്ടുപോകാനും വിതരണം ചെയ്യാനും അനുവാദമില്ല എന്ന് നമുക്കറിയാം. ഇന്ത്യൻ ഓയിൽ, ഭാരത് പെട്രോളിയം, ഹിന്ദുസ്ഥാൻ പെട്രോളിയം തുടങ്ങിയ എണ്ണ വിപണന കമ്പനികളാണ് ഇന്ത്യയിൽ പ്രധാനമായും ഇന്ധനവിതരണം നടത്തുന്നത്. ഈ ഇന്ധനവിതരണ കമ്പനികൾ തന്നെയാണ് ഓൺലൈൻ വഴി ഇന്ധനവിതരണം വീട്ടുപടിക്കൽ എത്തിക്കാനും നേതൃത്വം നൽകുന്നത്.
ഇഷ്ടമുള്ള പ്ലാറ്റ്ഫോമിൽ രജിസ്റ്റർ ചെയ്ത് നിങ്ങളുടെ സ്ഥലവും നിങ്ങൾക്ക് ആവശ്യമുള്ള ഇന്ധനത്തിന്റെ തരവും നൽകി വില സ്ഥിരീകരിക്കുക മാത്രമാണ് ഈ സേവനത്തിൽ നിങ്ങൾ ചെയ്യേണ്ടത്. നിലവിൽ പ്രധാന മെട്രോ നഗരങ്ങളിൽ മാത്രമാണ് ഇന്ധനം വാതിൽക്കൽ എത്തിക്കുന്ന സേവനം ആരംഭിച്ചിട്ടുള്ളത്. നിരവധി സ്റ്റാർട്ടപ്പ് കമ്പനികൾ ഈ ആശയം പര്യവേക്ഷണം ചെയ്യുന്നതിനാൽ ഇന്ത്യയിൽ ഇന്ധന വിതരണത്തിന്റെ വിപണി ഭാവിയിൽ കൂടുതൽ വിപുലീകരിക്കപ്പെടുമെന്നാണ് പ്രതീക്ഷിക്കുന്നത്.
നിലവിൽ ഇന്ത്യൻ ഓയിലിന്റെ സേവനമായ Fuel@Call വ്യാവസായിക, വാണിജ്യ ഉപഭോക്താക്കൾക്ക് ലഭ്യമാണ്. FuelBuddy, Hamsafar, PepFuels, Repos Energy തുടങ്ങിയ സ്റ്റാർട്ടപ്പ് കമ്പനികളും ഇപ്പോൾ ഇന്ത്യയിൽ ഇന്ധന വിതരണ സേവനങ്ങൾ ആരംഭിച്ചിട്ടുണ്ട്. പ്രധാനമായും ഡൽഹി, മുംബൈ, ബെംഗളൂരു എന്നിവിടങ്ങളിലാണ് നിലവിൽ ഈ സേവനങ്ങൾ ലഭ്യമാകുന്നത്. വൈകാതെ തന്നെ മറ്റു നഗരങ്ങളിലേക്കും ഓൺലൈൻ ഇന്ധനവിതരണം വ്യാപിക്കപ്പെടുന്നതാണ്.
