സിനിമ കാണാൻ എല്ലാവർക്കും ഇഷ്ടമാണ്. റിലീസ് ദിവസവും ആളും ബഹളവുമുള്ള തീയറ്ററിലുമൊക്കെ സിനിമ കാണാൻ ആഗ്രഹിക്കുന്നവരാണ് മിക്കവരും. എന്നാൽ മാത്രമേ ഒരു ഓളമുണ്ടാകൂ എന്നാണ് പലരും ചിന്തിക്കുന്നത്. തിരക്കില്ലാത്ത തീയേറ്ററുകളിൽ സമാധാനത്തോടെ സിനിമ കാണുന്ന ചെറിയ വിഭാഗം ആളുകളും നമ്മുടെ ഇടയിലുണ്ട്. എന്നാൽ, ഇതിലൊന്നും പെടാത്ത ഒരാളുടെ സിനിമ കാണലാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. വേറൊന്നും കൊണ്ടല്ല, സിനിമ കാണാനായി ഒരു തീയേറ്ററിലെ മുഴുവൻ ടിക്കറ്റും വാങ്ങിയിരിക്കുകയാണ് ഒരു ഇൻഫ്ലുവൻസർ.
താനൊരു ഇൻട്രോവെർട്ട് ആണെന്നാണ് ഇതിന് ഇയാൾ കാരണം പറഞ്ഞത്. ഒരു ഇൻട്രോവെർട്ട് ഇങ്ങനെയൊക്കെ ചെയ്യുമോ എന്നതുൾപ്പെടെ എന്തായാലും കമന്റ് ബോക്സുകളിൽ സംശയമുയർന്നിട്ടുണ്ട്.
‘താൻ ഒരു ഇൻട്രോവെർട്ടാണ്, അതുകൊണ്ട് ആൾക്കൂട്ടത്തിൽ സിനിമ കാണാൻ മടിയാണ്. അങ്ങനെ ഒരു തിയറ്ററിലെ മുഴുവൻ സീറ്റും താൻ തനിച്ച് ബുക്ക് ചെയ്തു. ശേഷം ഒറ്റക്കിരുന്ന് സിനിമ കണ്ടു’ എന്നാണ് യുവതി പറയുന്നത്. ആരുമില്ലാത്ത തീയറ്ററിന്റെ ദൃശ്യങ്ങളും യുവതി പങ്കുവച്ചിട്ടുണ്ട്. എറിക്ക ബൈദുരി എന്ന സോഷ്യൽ മീഡിയ ഇൻഫ്ലുവൻസറാണ് ഇത്തരമൊരു കാര്യം ചെയ്ത് ഇപ്പോൾ ചർച്ചയായിരിക്കുന്നത്.
യുവതി പോപ്‌കോൺ കഴിക്കുന്നതും, ഗ്ലാസ് ധരിച്ച് സിനിമ തുടങ്ങാൻ കാത്തിരിക്കുന്നതും എല്ലാം വീഡിയോയിൽ കാണാം. ‘ഞങ്ങൾ അന്തർമുഖരായ ആളുകളാണ്. അതുകൊണ്ട് തിയറ്ററിലെ സീറ്റുകൾ എല്ലാം വാങ്ങി’ എന്ന് വീഡിയോക്ക് യുവതി ക്യാപ്ഷനും കൊടുത്തിട്ടുണ്ട്.
എന്തായാലും നിരവധി പേരാണ് വീഡിയോയ്ക്ക് കമന്റുമായി എത്തിയിരിക്കുന്നത്. ഇത് കുറച്ചു കൂടിപ്പോയി എന്നും കാശുള്ളതിന്റെ അ‌ഹങ്കാരമാണെന്നും ആണ് പലരുടെയും അ‌ഭിപ്രായം. അ‌തേസമയം, അത് കുഴപ്പമുള്ള കാര്യമല്ലെന്നാണ് മറ്റൊരു വിഭാഗത്തിന്റെ അ‌ഭിപ്രായം. ‘എന്റെ കയ്യിൽ ഇത്രയും കാശുണ്ടെങ്കിൽ ഞാനും അത് ചെയ്തേനെ. കുട്ടികളുടെ ബഹളവും ആളുകളുടെ സംസാരവും ഒന്നും ഇല്ലാതെ തന്നെ സമാധാനമായി സിനിമ കാണാമല്ലോ’ എന്നാണ് ഒരാൾ കമന്റ് ഇട്ടത്. എന്നാൽ, സംഭവം ചർച്ചയായതിന് പിന്നാലെ താനത് തമാശയ്ക്കാണ് അങ്ങനെയൊരു കാപ്ഷൻ നൽകിയത്. കമന്റ് ബോക്സിൽ ആളുകൾ വെറുതെ അങ്ങോട്ടും ഇങ്ങോട്ടും വഴക്കിടുന്നത് കാണുമ്പോൾ രസം തന്നെ എന്നും പറഞ്ഞ് യുവതി രംഗത്ത് വന്നിരുന്നു.
Discussion about this post