കോഴിക്കോട് : നിയന്ത്രണം വിട്ട കാർ പൂർണ ഗർഭിണിയായ യുവതിക്ക് നേരെ പാഞ്ഞു കയറി അപകടം. കടലുണ്ടി റെയിൽവേ ഗേറ്റിന് സമീപമാണ് അപകടം നടന്നത്. കടലുണ്ടി കടവ് സ്വദേശിയായ അനീഷ റാഷിദ് എന്ന യുവതിയെയാണ് കാറിടിച്ചത്. അപകടത്തെ തുടർന്ന് ഗർഭസ്ഥശിശു മരണപ്പെട്ടു.
മാതാവിനോടൊപ്പം റോഡിലൂടെ യാത്ര ചെയ്യുന്ന സമയത്തായിരുന്നു യുവതിക്ക് അപകടമുണ്ടായത്. കോഴിക്കോട് നിന്നും പരപ്പനങ്ങാടിയിലേക്ക് പോവുകയായിരുന്ന കാറാണ് നിയന്ത്രണം തെറ്റി ഗർഭിണിയായ യുവതിക്ക് നേരെ പാഞ്ഞു കയറിയത്. കടലുണ്ടി റെയിൽവേ ഗേറ്റിന് സമീപമുള്ള ലാബിൽ രക്ത പരിശോധനയ്ക്കായി എത്തിയതായിരുന്നു പൂർണ്ണ ഗർഭിണിയായ അനീഷ.
അപകടം നടന്ന ഉടൻതന്നെ യുവതിയെ ആശുപത്രിയിൽ എത്തിച്ചിരുന്നു. അമിതമായ രക്തസ്രാവം ഉണ്ടായതോടെ യുവതിയെ സർജറിക്ക് വിധേയമാക്കി. ഇതോടെയാണ് ഗർഭസ്ഥശിശു മരിച്ചതായി കണ്ടെത്തിയത്. കടലുണ്ടി സ്വദേശി റാഷിദ് ആണ് അനീഷയുടെ ഭർത്താവ്.
