ന്യൂഡൽഹി: ഭൂമിയുടെ ഏത് കോണിൽ പോയി ഒളിച്ചാലും ഇന്ത്യൻ നാവിക സേന നിങ്ങളെ കണ്ടെത്തും എന്ന് പറഞ്ഞാൽ അത് വെറും വാക്ക് പറയുന്നതാണെന്ന് വിചാരിക്കരുത്. കാരണം അങ്ങ് അന്റാർട്ടിക്കയിൽ ഇനി പോകാൻ ഒരു കോണും ബാക്കിയില്ലാത്ത സ്ഥലത്ത് പറന്നു കളിക്കുന്നുണ്ട് ഇന്ത്യയുടെ ത്രിവർണ്ണ പതാക. 75 ആം റിപ്പബ്ലിക്ക് ദിനം രാജ്യം മൊത്തം ആഘോഷിച്ചപ്പോൾ വ്യത്യസ്തമായ ഒരു ആഘോഷവുമായി വന്നിരിക്കുകയാണ് ഇന്ത്യൻ നാവികസേനയുടെ ഹൈഡ്രോഗ്രാഫിക് വകുപ്പ്.
അൻ്റാർട്ടിക്കയിലേക്കുള്ള 43-ാമത് ഇന്ത്യൻ സയൻ്റിഫിക് എക്സ്പെഡിഷൻ്റെ (ISEA) ഭാഗമായി അവിടെയുള്ള ലാർസ്മാൻ ഹിൽസിൽ നിന്ന് ഒരു ഹൈഡ്രോഗ്രാഫിക് സർവേ നടത്തുന്നതിനായി ഈ കഴിഞ്ഞ ജനുവരി 17-ന് ഇന്ത്യയുടെ അൻ്റാർട്ടിക്കയിലുള്ള ഗവേഷണ സ്റ്റേഷൻ “ഭാരതി”യിൽ എത്തിയിരിക്കുകയാണ് NHD-യിൽ നിന്നുള്ള ഒരു ഹൈഡ്രോഗ്രാഫിക് സർവേ ടീം
സമുദ്ര നാവിഗേഷൻ, മറൈൻ നിർമ്മാണം, ഡ്രെഡ്ജിംഗ്, ഓഫ്ഷോർ വിൻഡ് ഫാമുകൾ, ഓഫ്ഷോർ ഓയിൽ പര്യവേക്ഷണം, ഡ്രില്ലിംഗ്, അനുബന്ധ പ്രവർത്തനങ്ങൾ എന്നിവയെ ബാധിക്കുന്ന പ്രേത്യേകതകളെ കുറിച്ച് വിവരം ശേഖരിക്കുവാനുള്ള ശാസ്ത്രീയ മാർഗ്ഗമാണ് ഹൈഡ്രോഗ്രാഫിക് സർവേ..
ഇന്ത്യൻ പതാകയും ഇന്ത്യൻ നാവിക സേനാ പതാകയും അന്റാർട്ടിക്കയിൽ സ്ഥാപിച്ചു കൊണ്ട് ഇത്തരം കഠിനവും സങ്കീർണ്ണതകൾ നിറഞ്ഞതുമായ പ്രവർത്തനങ്ങൾ നടപ്പിൽ വരുത്താനുള്ള കാര്യക്ഷമത ഇന്ത്യൻ നാവികസേനയ്ക്കുണ്ട് എന്ന് തെളിയിച്ചിരിക്കുകയാണ് നമ്മൾ എന്ന് നാവിക സേന സമൂഹ മാദ്ധ്യമങ്ങളിലൂടെ വെളിപ്പെടുത്തി.
“ഇന്ത്യൻ നേവൽ ഹൈഡ്രോഗ്രാഫിക് ഡിപ്പാർട്ട്മെൻ്റിൽ നിന്നുള്ള ഇന്ത്യൻ നേവിയുടെ ഹൈഡ്രോഗ്രാഫിക് സർവേ ടീം, ഭാരതി റിസർച്ച് സ്റ്റേഷനിലെ ലെഫ്റ്റനൻ്റ് സിഡിആർ റിഷഭ് റാവത്ത്, മൻജീത് പിഒ എന്നിവരടങ്ങുന്ന സംഘം അന്റാർട്ടിക്കയിൽ ത്രിവർണ്ണ പതാക ഉയർത്തി” നാവിക സേന പറഞ്ഞു .
Discussion about this post