ഉദയ്പൂർ: ബൈജൂസിന്റെ ഓഫീസിലെ ടിവി അഴിച്ചുകൊണ്ടു പോകുന്ന പിതാവിന്റെയും മകന്റെയും വീഡിയോ വൈറൽ. കഴിഞ്ഞ ദിവസം ബൈജൂസിന്റെ ഉദയ്പൂരിലെ ഓഫീസിൽ നടന്ന സംഭവങ്ങളുടെ വീഡിയോ ആണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. പണം നതിരികെ നൽകിയാൽ ടിവിയും തരികെ നൽകാമെന്ന് പറഞ്ഞാണ് ഇരുവരും ടിവി അഴിച്ചെടുത്ത് കൊണ്ടുപോകുന്നത്.
ഇരുവരും ഓഫീസിൽ വരുന്നതും ടിവി അഴിച്ചുകൊണ്ടു പോകുന്നതും വീഡിയോയിൽ കാണാം. ജീവനക്കാരൻ ഇതിനെ തടയുമ്പോൾ റീഫണ്ട് തന്നാൽ ടിവി തിരികെ നൽകാമെന്ന് ഇരുവരും പറയുന്നതും വീഡിയോയിൽ കാണാം.
‘സേവനം ഇഷ്ടപ്പെടാത്തത് കൊണ്ട് പ്ലാൻ റദ്ദാക്കിയിരുന്നു. നൽകിയ ഫീസ് തിരികെ നൽകാമെന്ന് കമ്പനി അറിയിച്ചതാണ്. എന്നാൽ, ആഴ്ച്ചകൾ കളിഞ്ഞിട്ടും അവർ പണം തിരികെ നലകുന്നില്ല. അതുകൊണ്ടാണ് ഇങ്ങനെയൊരു തീരുമാനത്തിലേക്ക് എത്തിയതെന്നും കുട്ടിയുടെ പിതാവ് പറഞ്ഞു.
അതേസമയം, സംഭവത്തിൽ ബൈജൂസ് ഇതുവരെയും പ്രതികരിച്ചിട്ടില്ല. നിരവധി കേസുകളാണ് ബൈജൂസിനെതിരെ നിലവിലുള്ളത്. ഉടമ ബൈജു രവീന്ദ്രനെതിരെ ഇഡി ലുക്ക് ഔട്ട് നോട്ടീസും പുറത്തിറക്കിയിരുന്നു. ഇതിന് പിന്നാലെയാണ് കമ്പനിക്കെതിരെ ഇത്തരത്തിലൊരു വീഡിയോയും പ്രചരിക്കുന്നത്.
നിലവിൽ കടുത്ത സാമ്പത്തിക പ്രതിസന്ധിയിലാണ് ബൈജൂസ്. നിരവധി കേസുകളും ഉള്ളതിനാൽ ബൈജു രവീന്ദ്രൻ രാജ്യം വിടാൻ സാദ്ധ്യതയുണ്ടെന്നാണ് ഇഡിയുടെ വിലയിരുത്തൽ. ഇതൊഴിവാക്കുന്നതിന് വേണ്ടിയാണ് നോട്ടീസ്. ബൈജൂസിനെതിരെ 9,362.35 കോടി രൂപയുടെ വിദേശനാണ്യ വിനിമയ ചട്ട ലംഘന കേസാണ് നിലവിലുള്ളത്. ചട്ടലംഘനം നടന്നതായുള്ള നിരവധി പരാതികൾ ലഭിച്ചതിനെ തുടർന്ന് കഴിഞ്ഞ വർഷം ഏപ്രിൽ 27, 28 തിയതികളിൽ ഇഡി ബൈജുവിന്റെ വീടുകളിലും സ്ഥാപനങ്ങളിലും പരിശോധന നടത്തിയിരുന്നു. ഇവിടെ നിന്നും കമ്പനിയുടെ സാമ്പത്തിക ഇടപാടുകൾ സംബന്ധിച്ച നിരവധി രേഖകൾ ആണ് ഇഡിയ്ക്ക് ലഭിച്ചത്. ഇതിൽ അന്വേഷണം പുരോഗമിക്കുകയാണ്.
Discussion about this post