എറണാകുളം : നെടുമ്പാശ്ശേരിയിൽ നടന്ന നവ കേരള സ്ത്രീ സദസ്സിൽ നടി ഐശ്വര്യ ലക്ഷ്മി പങ്കെടുത്തു. സ്ത്രീപക്ഷ നവകേരളം എന്ന ലക്ഷ്യത്തോടെ മുഖ്യമന്ത്രി പിണറായി വിജയൻ വിവിധ രംഗങ്ങളിൽ പ്രവർത്തിക്കുന്ന സ്ത്രീകളുമായി സംവദിക്കുന്ന മുഖാമുഖം: നവകേരള സ്ത്രീ സദസ്സ് ഇന്നു രാവിലെയാണ് നെടുമ്പാശ്ശേരിയിൽ വച്ച് സംഘടിപ്പിക്കപ്പെട്ടത്. സമൂഹത്തിലെ വിവിധ മേഖലകളിൽ നിന്നുള്ള 2000ത്തോളം സ്ത്രീകളെ പങ്കെടുപ്പിച്ച് കൊണ്ടാണ് പരിപാടി സംഘടിപ്പിച്ചത്.
സിനിമ ബിസിനസ് മേഖലയിലേക്ക് കൂടുതൽ സ്ത്രീകളെ കൊണ്ടു വരാനുള്ള നടപടികൾ ഉണ്ടാകണമെന്ന് നടി ഐശ്വര്യ ലക്ഷ്മി സദസ്സിൽ വച്ച് മുഖ്യമന്ത്രിയോട് ആവശ്യപ്പെട്ടു. സിനിമയുടെ സാങ്കേതികം, നിർമ്മാണം തുടങ്ങിയ മേഖല യുവതലമുറയെ പരിചയപ്പെടുത്തുന്ന പാഠ്യപദ്ധതികൾ രൂപീകരിക്കാനുള്ള നടപടികൾ സർക്കാരിന്റെ ഭാഗത്ത് നിന്ന് ഉണ്ടാകണമെന്നാണ് ഐശ്വര്യ ലക്ഷ്മിയും മുഖ്യമന്ത്രി പിണറായി വിജയനോട് ആവശ്യപ്പെട്ടത്.
ഐശ്വര്യ ലക്ഷ്മി സൂചിപ്പിച്ച എല്ലാം ശരിയാക്കാം എന്ന് മുഖ്യമന്ത്രി പിണറായി വിജയൻ ഉറപ്പു നൽകുകയും ചെയ്തു. സ്ത്രീകളെ ഈ മേഖലയിൽ പ്രാപ്തരാക്കുന്നതിന് പഠന സംവിധാനം ഒരുക്കും എന്നാണ് മുഖ്യമന്ത്രി വ്യക്തമാക്കിയത്. നിർമ്മാണം, സാങ്കേതികവിദ്യ എന്നീ മേഖലകളിലേക്ക് കൂടുതൽ സ്ത്രീകൾ കടന്നുവരുന്നതിന് ഇത്തരം പഠന സംവിധാനങ്ങൾ സഹായകരമാകും എന്നും മുഖ്യമന്ത്രി അഭിപ്രായപ്പെട്ടു.
Discussion about this post