ന്യൂഡൽഹി: ഈ വർഷത്തെ ഹോളി ഇങ്ങെത്തിക്കഴിഞ്ഞു. നാടും നഗരവും ആഘോഷങ്ങൾക്കായുള്ള തയ്യാറെടുപ്പുകളിലാണ്. നിറങ്ങളുടെ ആഘോഷമെന്ന് കൂടി ഹോളിയ്ക്ക് വിശേഷണമുണ്ട്. ഇതിന് കാരണം ഹോളിയിൽ നിറങ്ങളാണ് പ്രധാനം എന്നതുകൊണ്ടാണ്. നിറങ്ങൾ പരസ്പരം വാരി എറിഞ്ഞുകൊണ്ടാണ് ഹോളി ആഘോഷിക്കാറുള്ളത്. ഇതിനൊപ്പം മധുര വിതരണവും ഉണ്ടാകാറുണ്ട്.
ഹോളി ആഘോഷത്തിനായി പ്രധാനമായും ആറ് നിറങ്ങളാണ് ഉപയോഗിക്കാറുള്ളത്. ചുവപ്പ്, മഞ്ഞ, പച്ച, പിങ്ക്, പർപ്പിൾ, നീല എന്നിവയാണ് പ്രധാന നിറങ്ങൾ. പ്രദേശങ്ങൾക്ക് അനുസരിച്ച് നിറങ്ങൾ ഉപയോഗിക്കുന്നതിൽ മാറ്റം വരാം. നിറങ്ങൾക്കൊപ്പം വെള്ളവും ശരീരത്തിൽ ഒഴിക്കാറുണ്ട്.
ഓരോരോ നിറങ്ങൾക്കും അർത്ഥമുണ്ട്. മനുഷ്യരുടെ വ്യത്യസ്ത വികാരങ്ങളെയാണ് ഹോളിയിലെ നിറങ്ങൾ സൂചിപ്പിക്കുന്നത്.
ചുവപ്പ് സ്നേഹത്തിന്റെയും അഭിനിവേശത്തിന്റെയും പ്രതീകമാണ്. മഞ്ഞ എന്നത് സന്തോഷത്തെ പ്രതിനിധീകരിക്കുന്നു. പുതിയ തുടക്കങ്ങളെ ആണ് പച്ച സൂചിപ്പിക്കുന്നത്. പിങ്ക് പ്രണയത്തിന്റെയും സൗഹൃദത്തിന്റെയും അടയാളമാണ്. ഈ നിറങ്ങൾ എല്ലാം കൂടിച്ചേരുമ്പോൾ ഊർജ്ജസ്വലമായ അന്തരീക്ഷം സൃഷ്ടിക്കപ്പെടുന്നു.
ചിലയിടങ്ങളിൽ നിറങ്ങൾ ദൈവങ്ങളുമായി ബന്ധപ്പെട്ടിരിക്കുന്നു. ഉദാഹരണം നീല വിഷ്ണുവിനെയും ചുവപ്പ് ശിവനെയും മഞ്ഞ ബ്രഹ്മാവിനെയും സൂചിപ്പിക്കുന്നു. ഈ മൂന്ന് നിറങ്ങളും കൂടി ചേരുന്നത് സമൂഹത്തിന്റെ ഐക്യത്തെ കൂടിയാണ് സൂചിപ്പിക്കുന്നത്.
Discussion about this post