ന്യൂഡൽഹി:രാജ്യത്തെ എല്ലാ റെയിൽവേ സ്റ്റേഷനുകളിലും കേന്ദ്ര സർക്കാരിൻെ ഭാരത് അരി വിതരണം ചെയ്യും. ഉപഭോക്തൃകാര്യ, ഭക്ഷ്യ പൊതുവിതരണ മന്ത്രാലയമാണ് ഇക്കാര്യം വ്യക്തമാക്കിയത്. മൊബൈൽ വാനുകൾ ഉപയോഗിച്ചായിരിക്കും വിതരണം നടത്തുകയെന്നും പൊതുവിതരണ മന്ത്രാലയം അറിയിച്ചു.
പൊതുവിതരണവകുപ്പിന്റെ തീരുമാനത്തിന് റെയിൽവേ പാസഞ്ചർ മാർക്കറ്റിങ് എക്‌സിക്യുട്ടീവ് ഡയറക്ടർ അനുമതി നൽകി. ഇതിനായി പ്രത്യേക ലൈസൻസോ , പ്രത്യേക ചാർജോ റെയിൽവേ ഈടാക്കില്ല. ഭാരത് അരി, ഭാരത് ആട്ട എന്നിവയാകും വിതരണം ചെയ്യുക. എല്ലാദിവസവും വൈകിട്ട് രണ്ടുമണിക്കൂർ നേരമായിരിക്കും വിൽപ്പന. അടുത്ത മൂന്ന് മാസത്തേക്ക് പരീക്ഷണാടിസ്ഥാനത്തിലായിരിക്കും റെയിൽവേ സ്റ്റേഷനുകളിൽ വിതരണം നടക്കുക.
ഭാരത് അരി കിലോയ്ക്ക് 29 രൂപയും , ഭാരത് ആട്ടയ്ക്ക് 27.50 രൂപയ്ക്കുമായാണ് കേന്ദ്ര സർക്കാർ ജനങ്ങളിലേക്ക് എത്തിക്കുന്നത്. അതേസമയം ഭാരത് അരിക്ക് രാജ്യത്ത് വൻ ഡിമാന്റ്ാണ് . വില കുറവിൽ ജനങ്ങൾക്ക് ലഭിക്കുന്നത് കൊണ്ടാണ് ഭാരത് അരിക്ക് ഇത്ര ഡിമാന്റ് വർദ്ധിക്കാൻ കാരണം.
