തിരുവനന്തപുരം-നാഗർകോവിൽ റെയിൽവേ പാതയിൽ പാറശ്ശാലയ്ക്ക് സമീപം റെയിൽവേ ട്രാക്കിലേക്ക് മണ്ണും കല്ലും ഇടിഞ്ഞുവീണ് ട്രെയിൻ ഗതാഗതം പൂർണമായും തടസ്സപ്പെട്ടു. ബിലാസ്പൂർ – തിരുനെൽവേലി എക്സ്പ്രസ് കടന്നുപോകുന്നതിനിടെ പാറശ്ശാല ഇലങ്കം ക്ഷേത്രത്തിന് സമീപത്തുവെച്ചാണ് സംഭവം. മണ്ണിടിച്ചിലിനെ തുടർന്ന് ട്രെയിനിന്റെ എൻജിൻ ട്രാക്കിൽ നിന്ന് തെന്നിമാറിയെങ്കിലും വേഗത കുറവായിരുന്നതിനാൽ തലനാരിഴയ്ക്ക് വൻ ദുരന്തം ഒഴിവായി. അപകടത്തിൽ ആർക്കും പരിക്കുകളില്ല.
പ്രദേശത്ത് കഴിഞ്ഞ രാത്രി മുതൽ പെയ്ത ശക്തമായ മഴയെ തുടർന്നാണ് ട്രാക്കിലേക്ക് മണ്ണും കല്ലും ഇടിഞ്ഞുവീണത്. അപകടത്തെ തുടർന്ന് താംബരം – തിരുവനന്തപുരം സെൻട്രൽ സ്പെഷ്യൽ ഇരാണിയേലിലും, മധുരൈ – പുനലൂർ എക്സ്പ്രസ് പനക്കുടിയിലും, താംബരം – തിരുവനന്തപുരം സെൻട്രൽ അമൃത് ഭാരത് എക്സ്പ്രസ് നാഗർകോവിൽ ജങ്ഷനിലും പിടിച്ചിട്ടു.
കൂടാതെ പരശുറാം എക്സ്പ്രസ്, കന്യാകുമാരി-പുനലൂർ പാസഞ്ചറുകൾ, ചെന്നൈ എഗ്മോർ എക്സ്പ്രസ് തുടങ്ങിയ നിരവധി ട്രെയിനുകൾ വൈകിയാണ് ഓടുന്നത്. റെയിൽവേ ജീവനക്കാരുടെയും നാട്ടുകാരുടെയും നേതൃത്വത്തിൽ ട്രാക്കിലെ തടസ്സങ്ങൾ നീക്കി ഗതാഗതം പുനഃസ്ഥാപിക്കാനുള്ള ശ്രമങ്ങൾ യുദ്ധകാലാടിസ്ഥാനത്തിൽ പുരോഗമിക്കുകയാണ്.
