തിരുവനന്തപുരം: സംസ്ഥാനത്ത് വിവിധ സർക്കാർ ആശുപത്രികളിൽ ശസ്ത്രക്രിയ ഉപകരണങ്ങൾ വിതരണം ചെയ്യുന്ന സ്ഥാപനങ്ങൾക്കുള്ള 143 കോടിയുടെ കുടിശിക ഉടൻ വിതരണം ചെയ്തില്ലെങ്കിൽ ഏപ്രിൽ മുതൽ വിതരണം നിറുത്തുമെന്ന് മുന്നറിയിപ്പ് നൽകി സ്ഥാപനങ്ങൾ. ഇങ്ങനെ സംഭവിച്ചാൽ മെഡിക്കൽ കോളേജുകൾ ഉൾപ്പെടെയുള്ള സംസ്ഥാനത്തെ ആശുപത്രികളിൽ ശസ്ത്രക്രിയകൾ മുടങ്ങുമെന്ന ഉറപ്പായി.
കഴിഞ്ഞ അഗസ്റ്റിലും സമാനമായ സാഹചര്യം വന്നപ്പോൾ ഉപകരണങ്ങൾ നൽകുന്നത് സ്ഥാപനങ്ങൾ നിർത്തി വച്ചിരുന്നു.തുടർന്ന് ഹൃദയ സംബന്ധമായ ശസ്ത്രക്രിയകൾ ഒരാഴ്ച മുടങ്ങുന്ന സാഹചര്യം ഉണ്ടായി. എന്നാൽ അത് തിരുവനന്തപുരത്ത് മാത്രം ഒതുങ്ങി നിന്നിരുന്നുവെങ്കിൽ ഇപ്പോൾ സംസ്ഥാന വ്യാപകമായിട്ടാണ് പ്രതിസന്ധി.
തിരുവനന്തപുരം മെഡിക്കൽ കോളേജിന് 50 കോടിയോളവും, കോട്ടയം മെഡിക്കൽ കോളേജിന് 18 കോടിയും, കോഴിക്കോട് മെഡിക്കൽ കോളേജിന് 23 കൊടിയും ആണ് കുടിശിക. നേരത്തെ കോഴിക്കോട് മെഡിക്കൽ കോളേജിൽ മരുന്ന് കമ്പനികൾക്കുള്ള കുടിശിക നൽകാത്തതിനാൽ ഡയാലിസിസ് അടക്കമുള്ള രോഗികൾക്ക് മരുന്നുകൾ പുറത്ത് നിന്നും മേടിക്കേണ്ട സാഹചര്യം വന്നിരുന്നു.
നാളെ ആശുപത്രി സൂപ്രണ്ടുമാരുമായി സ്ഥാപനങ്ങൾ നടത്തുന്ന ചർച്ചയിൽ തീരുമാനമായില്ലെങ്കിൽ വിതരണം ഭാഗികമായി നിറുത്താനാണ് നീക്കം. അതോടെ ആശുപത്രികളിൽ ശസ്ത്രക്രിയകൾ മുടങ്ങും. മരുന്ന് ക്ഷാമത്തിൽ വലയുന്ന ആശുപത്രികളിൽ ശസ്ത്രക്രിയകൂടി മുടങ്ങിയാൽ രോഗികൾ കഷ്ടത്തിലാകും
Discussion about this post