ന്യൂഡൽഹി: മദ്യനയക്കേസിൽ അറസ്റ്റിലായ ഡൽഹി മുഖ്യമന്ത്രി അരവിന്ദ് കെജ്രിവാളിന്റെ ഭാര്യ സുനിത കെജ്രിവാളിനെതിരെ വിമർശനവുമായി ബിജെപി എംപി മനോജ് തിവാരി. മറ്റ് പാർട്ടികളുമായി സഖ്യത്തിലാകില്ലെന്ന് നിങ്ങളുടെ കുട്ടികളുടെ പേരിൽ സത്യം ചെയ്ത് അത് തെറ്റിച്ചപ്പോൾ നിങ്ങൾ എവിടെയായിരുന്നു?. ഡൽഹിയിലെ ജനങ്ങൾക്ക് നിങ്ങളോടോ നിങ്ങളുടെ ഭർത്താവ് അരവിന്ദ് കെജ്രിവാളിനോടൊ ഒരു സഹതാപവും തോന്നുന്നില്ലെന്നും അദ്ദേഹം വ്യക്തമാക്കി. അരവിന്ദ് കെജ്രിവാൾ ജയിലിൽ നിന്ന് കൈമാറിയ സന്ദേശം സുനിത പുറത്ത് വിട്ടതിന് പിന്നാലെയായിരുന്നു മനോജ് തിവാരിയുടെ വിമർശനം.
മറ്റ് പാർട്ടികളുമായി സഖ്യത്തിലേർപ്പെടില്ലെന്ന് നിങ്ങളുടെ കുട്ടികളുടെ പേരിൽ സത്യം ചെയ്ത് അത് തെറ്റിച്ചപ്പോൾ നിങ്ങൾ എവിടെയായിരുന്നു?. സർക്കാർ വാഹനമോ ബംഗ്ലാവോ എടുക്കില്ലെന്ന് ശപഥം ചെയ്തിട്ടും ഒരു മാളിക തന്നെ അദ്ദേഹത്തിനായി പണിതപ്പോൾ നിങ്ങൾ എവിടെയായിരുന്നു?. കെട്ട് കണക്കിന് പണം കെജ്രിവാൾ കൊണ്ടുവന്ന് സൂക്ഷിച്ച അതേ വീട്ടിൽ തന്നെയല്ലേ നിങ്ങളും ജീവിച്ചത്?. ഡൽഹിയിലെ ജനങ്ങൾക്ക് നിങ്ങളോടോ നിങ്ങളുടെ ഭർത്താവിനോടോ ഇപ്പോൾ ഒരു സഹതാപവുമില്ല’- മനോജ് തിവാരി വ്യക്തമാക്കി.
സമൂഹത്തിന് വേണ്ടി പ്രവർത്തിക്കുന്നത് തുടരണമെന്നും ബിജെപിയിൽ നിന്നുള്ളവരെ പോലും വെറുക്കരുത്. അവരെല്ലാം ഞങ്ങളുടെ സഹോദരീ സഹോദരന്മാരാണ് എന്നുമായിരുന്നു കെജ്രിവാളിന്റെ സന്ദേശം. അറസ്റ്റിൽ അത്ഭുതം ഇല്ലേ. ജനങ്ങളുടെ അനുഗ്രഹം ഒപ്പമുണ്ട്. കുടുംബത്തിന് വേണ്ടി എല്ലാവരും പ്രാർത്ഥിക്കണം. വേഗം പുറത്തുവരും. രാജ്യത്തെ ദുർബലപെടുത്തുന്ന ശക്തികൾ രാജ്യത്തിനു അകത്തും പുറത്തുമുണ്ട്. ഇവരെ മനസിലാക്കണം. ജാഗ്രത പാലിക്കണമെന്നും കെജ്രിവാൾ സന്ദേശത്തിൽ പറയുന്നു.
Discussion about this post