ന്യൂഡൽഹി : ലോക്സഭ തെരഞ്ഞെടുപ്പിന് ഉള്ള കോൺഗ്രസിന്റെ ഒമ്പതാം ഘട്ട സ്ഥാനാർത്ഥി പട്ടിക പ്രഖ്യാപിച്ചു. ഇത്തവണയും അമേഠിയിലും റായ്ബറേലിയിലും സ്ഥാനാർത്ഥികൾ ആയിട്ടില്ല. രാജസ്ഥാനിൽ നേരത്തെ പ്രഖ്യാപിച്ച രണ്ട് സ്ഥാനാർത്ഥികളെ പിൻവലിച്ച് പുതിയ സ്ഥാനാർത്ഥികളെ പ്രഖ്യാപിച്ചു. ഒമ്പതാം ഘട്ട പട്ടികയോടെ കോൺഗ്രസ് ഇതുവരെ പ്രഖ്യാപിച്ച സ്ഥാനാർത്ഥികളുടെ എണ്ണം 208 ആയി.
രാജസ്ഥാനിലെ രാജസമന്ദ് മണ്ഡലത്തിൽ നേരത്തെ പ്രഖ്യാപിച്ച സ്ഥാനാർത്ഥിയായ സുദർശൻ റാവത്തിന് പകരം ദാമോദർ ഗുജ്ജർ സ്ഥാനാർത്ഥിയാകുന്നതാണ്. മറ്റൊരു മണ്ഡലമായ ഭിൽവാഡയിൽ ദാമോദർ ജോഷിക്ക് പകരമായി എത്തുന്നത് മുൻ സ്പീക്കർ ആയ സിപി ജോഷി ആണ്. ആദ്യഘട്ട തെരഞ്ഞെടുപ്പ് നടക്കുന്ന കർണാടകയിലെ 3 മണ്ഡലങ്ങളിലേക്കും കോൺഗ്രസ് സ്ഥാനാർത്ഥികളെ പ്രഖ്യാപിച്ചിട്ടുണ്ട്. ബെല്ലാരി, ചാമരാജ് നഗർ, ചിക്കബെല്ലപ്പൂര് എന്നീ മണ്ഡലങ്ങളിലേക്ക് ആണ് ഒമ്പതാംഘട്ട സ്ഥാനാർത്ഥി പട്ടികയിൽ കോൺഗ്രസ് സ്ഥാനാർഥികളെ പ്രഖ്യാപിച്ചത്.
അതേസമയം സ്വാതന്ത്ര്യാനന്തരം കോൺഗ്രസിന്റെയും ഗാന്ധി കുടുംബത്തിന്റെയും കുത്തക മണ്ഡലങ്ങളായിരുന്ന അമേഠിയിലും റായ്ബറേലിയിലും ഇപ്പോൾ മത്സരിക്കാൻ ആളെ കിട്ടാതെ വലയുകയാണ് കോൺഗ്രസ്. കഴിഞ്ഞ ലോക്സഭാ തെരഞ്ഞെടുപ്പിന് അമേഠിയിൽ രാഹുൽ ഗാന്ധിയും റായ്ബറേലിയിൽ സോണിയ ഗാന്ധിയും ആയിരുന്നു മത്സരിച്ചിരുന്നത്. കഴിഞ്ഞ തിരഞ്ഞെടുപ്പിൽ രാഹുൽ ഗാന്ധിക്ക് അമേഠിയിൽ ബിജെപിയുടെ സ്മൃതി ഇറാനിയോട് കനത്ത തോൽവിയായിരുന്നു ഉണ്ടായിരുന്നത്. അതിനാൽ തന്നെ ഇത്തവണ ഈ മണ്ഡലങ്ങളിൽ ഗാന്ധി കുടുംബത്തിന് തീരെ താല്പര്യം ഇല്ലാത്ത മട്ടാണ്. ഈ മണ്ഡലങ്ങളിലേക്കുള്ള സ്ഥാനാർത്ഥികളെ കണ്ടെത്തുന്നതിനായി ചർച്ചകൾ നടക്കുകയാണെന്നും ഏപ്രിൽ പകുതിയോടെ തീരുമാനം ഉണ്ടാകും എന്നുമാണ് സൂചന.
Discussion about this post