ജയ്പൂർ: കർഫ്യുകൾ കൊണ്ട് കോൺഗ്രസ് പാർട്ടി ഭരണം നടത്തിയിരുന്ന ഒരു കാലഘട്ടം ഈ രാജ്യത്തിനുണ്ടായിരുന്നു എന്ന് ഓർമിപ്പിച്ച് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. എന്നാൽ കഴിഞ്ഞ ഏഴ് വര്ഷങ്ങളായി ഉത്തർപ്രദേശിൽ ഒരു ലഹള പോലും ഉണ്ടായിട്ടില്ല എന്നും ആദിത്യനാഥ് കൂട്ടിച്ചേർത്തു. രാജസ്ഥാനിലെ ദസുവയിൽ നടന്ന പൊതു റാലിയിൽ വച്ചാണ് കോൺഗ്രസിന്റെ മുൻ കാല ഭരണത്തെ നിശിതമായി വിമർശിച്ച് യോഗി ആദിത്യനാഥ് രംഗത്ത് വന്നത്.
കോൺഗ്രസിന്റെ ഭരണകാലത്ത് രാജ്യത്ത് കർഫ്യുകൾ എന്നത് ഒരു സാധാരണ സംഭവം ആയിരുന്നെങ്കിലും ഇന്ന് ഉത്തർപ്രദേശിലോ, ബി ജെ പി യുടെ ഭരണത്തിന്റെ കീഴിൽ മറ്റ് സ്ഥലങ്ങളിലോ അത്തരമൊരു സാഹചര്യം നിലനിൽക്കുന്നില്ല യോഗി ആദിത്യനാഥ് വ്യക്തമാക്കി
“കോൺഗ്രസ് മുമ്പ് കർഫ്യൂ ഏർപ്പെടുത്താറുണ്ടായിരുന്നു . ഇപ്പോൾ യുപിയിൽ കർഫ്യൂ എന്നത് കേട്ട് കേൾവി പോലുമില്ല. കഴിഞ്ഞ ഏഴ് വർഷമായി ഇവിടെ കലാപങ്ങളൊന്നും ഉണ്ടായിട്ടില്ല. ബിജെപി ജനങ്ങൾക്ക് സുരക്ഷ ഒരുക്കുന്നു. ഈ തിരഞ്ഞെടുപ്പ് വെറുമൊരു തെരഞ്ഞെടുപ്പല്ല, മറിച്ച് വികസിത ഭാരതം എന്ന സങ്കല്പത്തെ യാഥാർഥ്യമാക്കാനുള്ള അവസരം കൂടെയാണ്. പരിവർത്തനം ചെയ്യുന്ന ഒരു ഇന്ത്യയെയാണ് നമ്മൾ കണ്ടു കൊണ്ടിരിക്കുന്നത് ,” അദ്ദേഹം പറഞ്ഞു.
