തിരുവനന്തപുരം : വരും മണിക്കൂറുകളിൽ കേരളത്തിലെ മൂന്ന് ജില്ലകളിൽ മഴയ്ക്ക് സാധ്യതയുള്ളതായി കാലാവസ്ഥ വകുപ്പിന്റെ മുന്നറിയിപ്പ്. കോട്ടയം, പത്തനംതിട്ട, ആലപ്പുഴ ജില്ലകളിലാണ് അടുത്ത മണിക്കൂറുകളിൽ മഴയ്ക്ക് സാധ്യതയുള്ളത്. ഒറ്റപ്പെട്ട ഇടങ്ങളിൽ ഇടിമിന്നലോട് കൂടിയ നേരിയതോ മിതമായതോ ആയ മഴയ്ക്കാണ് സാധ്യതയുള്ളത്.
വെള്ളിയാഴ്ചയോടെ കേരളത്തിൽ വ്യാപകമഴയ്ക്കു സാധ്യതയുള്ളതായി കേന്ദ്ര കാലാവസ്ഥ വകുപ്പ് അറിയിച്ചു. കൂടാതെ വരും ദിവസങ്ങളിൽ മണിക്കൂറിൽ 40 കിലോമീറ്റർ വരെ വേഗതയിൽ വീശിയക്കാവുന്ന ശക്തമായ കാറ്റിനും സാധ്യതയുണ്ട്. പതിമൂന്നാം തീയതി വരെ കേരളത്തിലെ ഒറ്റപ്പെട്ട ഇടങ്ങളിൽ ഇടമിന്നലോട് കൂടിയ മഴയുണ്ടാകാൻ സാധ്യതയുള്ളതിനാൽ ജാഗ്രത പുലർത്തണമെന്നും നിർദ്ദേശമുണ്ട്.
വേനൽ മഴയ്ക്ക് ഒപ്പം എത്തുന്ന ഇടിമിന്നൽ ഏറെ അപകടകാരിയാണെന്ന് മുന്നറിയിപ്പിൽ സൂചിപ്പിക്കുന്നു. വൈദ്യുതിയുമായി ബന്ധിപ്പിച്ചിട്ടുള്ള വീട്ടുപകരണങ്ങൾക്ക് പലപ്പോഴും വേനൽ മഴയോടൊപ്പം ഉള്ള ഇടിമിന്നലിൽ നാശനഷ്ടങ്ങൾ ഉണ്ടാകാറുണ്ട്. അതിനാൽ തന്നെ ഇടിമിന്നലിന്റെ ലക്ഷണങ്ങൾ ഉണ്ടാകുമ്പോൾ തന്നെ അപകട സാധ്യതയുള്ള ഗൃഹോപകരണങ്ങളുടെ വൈദ്യുതി ബന്ധം വിച്ഛേദിക്കേണ്ടതാണ്. കൂടാതെ ടെലഫോണിന്റെ ഉപയോഗം ഒഴിവാക്കുകയും സുരക്ഷിതമായ കെട്ടിടങ്ങൾക്കുള്ളിൽ കരുതലോടെ ഇരിക്കുകയും വേണമെന്ന് മുന്നറിയിപ്പിൽ സൂചിപ്പിക്കുന്നു.
