ശിവൻ ദരിദ്രരുടെയും ശ്രീരാമൻ പണക്കാരുടെയും ദൈവമാണെന്ന തെലങ്കാന മുഖ്യമന്ത്രി രേവന്ത് റെഡ്ഡിയുടെ പരാമർശം രാജ്യത്ത് വൻ രാഷ്ട്രീയ വിവാദത്തിലേക്ക്. ഡൽഹിയിൽ നടന്ന ഒരു ചടങ്ങിൽ സംസാരിക്കവെയാണ് കോൺഗ്രസ് നേതാവ് കൂടിയായ രേവന്ത് റെഡ്ഡി ബിജെപിയെ വിമർശിച്ചുകൊണ്ട് ഈ വിവാദ പ്രസ്താവന നടത്തിയത്. ഉത്തരേന്ത്യയിൽ ബിജെപി വിജയം നേടുന്നത് ശ്രീരാമനെ സ്വന്തമാക്കിയതിനാലാണെന്നും അദ്ദേഹം ആരോപിച്ചു. ദക്ഷിണേന്ത്യക്കാർ ദ്രാവിഡരും ശിവഭക്തരുമാണെന്നും ഉത്തരേന്ത്യക്കാർ ആര്യന്മാരും രാമഭക്തരുമാണെന്നും പറഞ്ഞ അദ്ദേഹം ബിജെപി പണക്കാരുടെ പാർട്ടിയാണെന്നും കുറ്റപ്പെടുത്തി.
ബിജെപി നേതാക്കൾ ‘ജയ് ശ്രീറാം’ എന്ന് മാത്രമാണ് വിളിക്കുന്നതെന്നും എന്തുകൊണ്ടാണ് അവർ ‘ഹർ ഹർ മഹാദേവ്’ എന്ന് വിളിക്കാത്തതെന്നും അദ്ദേഹം ചോദ്യമുന്നയിച്ചു. വോട്ടർ പട്ടികയിലെ വീഴ്ചകൾ പരിഹരിക്കാനുള്ള നടപടികൾ വഴി വോട്ടുകൾ വെട്ടിമാറ്റി ബിജെപിയെ സഹായിക്കാനാണ് ശ്രമ നടക്കുന്നതെന്നും അദ്ദേഹം ആരോപിച്ചു. തങ്ങളുടെ രാഷ്ട്രീയ നേട്ടങ്ങൾക്കായി ബിജെപി ജനങ്ങളെ വിഭജിക്കുകയാണെന്നും കേന്ദ്രത്തിലെ പ്രധാന വകുപ്പുകളെല്ലാം ഉത്തരേന്ത്യൻ നേതാക്കളുടെ കൈകളിലാണെന്നും റെഡ്ഡി കൂട്ടിച്ചേർത്തു.
എന്നാൽ രേവന്ത് റെഡ്ഡിയുടെ പ്രസ്താവനയ്ക്കെതിരെ ശക്തമായ പ്രതികരണവുമായി ബിജെപി നേതൃത്വം രംഗത്തെത്തി. ദൈവങ്ങളുടെ പേരിൽ ജനങ്ങളെയും ദക്ഷിണേന്ത്യയെയും ഉത്തരേന്ത്യയെയും തമ്മിൽ ഭിന്നിപ്പിക്കാനാണ് കോൺഗ്രസ് ശ്രമിക്കുന്നതെന്ന് കേന്ദ്രമന്ത്രി ബന്ദി സഞ്ജയ് കുമാർ കുറ്റപ്പെടുത്തി. പ്രധാനമന്ത്രി നരേന്ദ്ര മോദി തന്നെ ‘ഹർ ഹർ മഹാദേവ്’ എന്ന് സദസ്സുകളിൽ വിളിക്കുന്നതിന്റെ ദൃശ്യങ്ങൾ പങ്കുവെച്ചാണ് ബിജെപി ഇതിന് മറുപടി നൽകിയത്. സനാതന ധർമ്മത്തിൽ ശിവനും വിഷ്ണുവും ഒന്നാണെന്നും വോട്ട് ബാങ്ക് രാഷ്ട്രീയം കളിക്കുന്ന കോൺഗ്രസിന് ഇതിന്റെ പ്രാധാന്യം മനസ്സിലാകില്ലെന്നും ബിജെപി തിരിച്ചടിച്ചു.
