പാലക്കാട് : മുഖ്യമന്ത്രി പിണറായി വിജയനെതിരെ രൂക്ഷ വിമർശനവുമായി രാഹുൽഗാന്ധി. രാജ്യത്തെ രണ്ടു മുഖ്യമന്ത്രിമാർ ജയിലിലാണ്. എന്നാൽ പിണറായി വിജയനെതിരെ കേന്ദ്ര ഏജൻസികൾ യാതൊരു അന്വേഷണവും നടത്തുന്നില്ലെന്ന് രാഹുൽ ഗാന്ധി കുറ്റപ്പെടുത്തി. പിണറായി വിജയൻ ബിജെപിയുമായി ഒത്തു കളിക്കുകയാണെന്നും രാഹുൽഗാന്ധി സൂചിപ്പിച്ചു.
“ഞാൻ രാവും പകലും ബിജെപിക്കെതിരെ സംസാരിക്കുകയാണ്. എന്നാൽ പിണറായി വിജയൻ രാവും പകലും എനിക്ക് എതിരെയാണ് സംസാരിക്കുന്നത്. എന്റെ ഔദ്യോഗിക വസതി കേന്ദ്രസർക്കാർ കൊണ്ടുപോയപ്പോഴും ഞാൻ പറഞ്ഞത് കേരളത്തിലും ഉത്തർപ്രദേശിലും ഇന്ത്യയിൽ എല്ലായിടത്തും എനിക്ക് ലക്ഷക്കണക്കിന് വീടുകൾ ഉണ്ടെന്നാണ്. എന്നാൽ എന്തുകൊണ്ടാണ് കേരള മുഖ്യമന്ത്രിയുടെ വസതി ആരും കൊണ്ടുപോകാത്തത്?. എന്തുകൊണ്ടാണ് ഇ ഡിയോ സിബിഐയോ പിണറായി വിജയനെ ചോദ്യം ചെയ്യാത്തത്?. ഇതെങ്ങനെ സംഭവിക്കുന്നു?” എന്നും രാഹുൽ ഗാന്ധി ചോദ്യമുന്നയിച്ചു.
പാലക്കാട് നടന്ന തിരഞ്ഞെടുപ്പ് സമ്മേളനത്തിൽ സംസാരിക്കുമ്പോൾ ആയിരുന്നു രാഹുൽ ഗാന്ധി മുഖ്യമന്ത്രി പിണറായി വിജയനെതിരെ രൂക്ഷ വിമർശനം ഉന്നയിച്ചത്. കേരള മുഖ്യമന്ത്രിക്കെതിരെ കേന്ദ്ര ഏജൻസികൾ യാതൊരു അന്വേഷണവും നടത്താത്തത് മലയാളികൾ ചിന്തിക്കേണ്ട വിഷയമാണെന്നും രാഹുൽ ഗാന്ധി വ്യക്തമാക്കി.
