ചെന്നൈ : ലോക്സഭാ തിരഞ്ഞെടുപ്പിൽ വോട്ട് രേഖപ്പെടുത്തി തമിഴകത്തെ സുപ്പർ താരങ്ങൾ. സൂപ്പർസ്റ്റാർ രജനികാന്തും കമൽഹാസനുമാണ് ചെന്നൈയിലെ അതത് പോളിംഗ് ബൂത്തിൽ എത്തി വോട്ട് രേഖപ്പെടുത്തിയത്. നടൻ ധനുഷ് , വിജയ് സേതുപതി, അജിത് കുമാർ, ശിവകാർത്തികേയൻ, ഗൗതം കാർത്തിക്, സംവിധായകരായ സുന്ദർ സി, വെട്രി മാരൻ, ശശികുമാർ എന്നിവരും വോട്ട് രേഖപ്പെടുത്തി.
നടൻ ധനുഷ് ടിടികെ റോഡിലെ സെന്റ് ഫ്രാൻസിസ് സേവ്യർ സ്കൂളിൽ രാവിലെ എട്ടുമണിയോടെയാണ് വോട്ട് രേഖപ്പെടുത്തിയത്. കിൽപ്പോക്കിലെ ചെന്നൈ ഹൈസ്കൂളിലെത്തിയാണ് വിജയ് സേതുപതി വോട്ട് ചെയ്തത്.
രജനികാന്ത് എല്ലാവരേയും അഭിവാദ്യം ചെയ്യുകയും ഫോട്ടോ എടുക്കാനായി വോട്ട് രേഖപ്പെടുത്തിയ വിരൽ കാണിച്ചു കൊടുക്കുകയും ചെയ്തു. മക്കളുടെ കൂടെയാണ് കമൽഹാസൻ വോട്ട് രേഖപ്പെടുത്താൻ പോളിംഗ് ബൂത്തിൽ എത്തിയത്.
ലോക്സഭാ തിരഞ്ഞെടുപ്പിലേക്കുള്ള ആദ്യ ഘട്ട പോളിംഗ് ഇന്നാണ് ആരംഭിച്ചത്. രാവിലെ ഏഴിന് ആരംഭിച്ച വോട്ടെടുപ്പ് വൈകീട്ട് അഞ്ചിന് അവസാനിക്കും. 21 സംസ്ഥാനങ്ങളിലെ മണ്ഡലങ്ങളാണ് ഇന്ന് ജനവിധി തേടുന്നത്. ഇതിൽ തമിഴ്നാട്ടിലെ തിരഞ്ഞെടുപ്പാണ് ഏവരും ഉറ്റുനോക്കുന്നത്. ആദ്യഘട്ടത്തിൽ മുഴുവൻ മണ്ഡലങ്ങളിലും തിരഞ്ഞെടുപ്പ് നടക്കുന്ന ഏക സംസ്ഥാനം ആണ് തമിഴ്നാട്. 39 ലോക്സഭാ സീറ്റുകൾ ആണ് തമിഴ്നാട്ടിൽ ഉള്ളത്.
Discussion about this post