തിരുവനന്തപുരം : അന്തർ സംസ്ഥാന സർവീസിന് ഒരുങ്ങുന്ന നവ കേരള ബസ് ഇനിമുതൽ ‘ഗരുഡ പ്രീമിയം’ എന്ന പേരിൽ അറിയപ്പെടും. നവ കേരള യാത്രയ്ക്ക് വേണ്ടി ഭാരത് ബെൻസിൽ നിന്നും ഒന്നേകാൽ കോടി രൂപ ചിലവിൽ വാങ്ങിയ ബസ് ആണ് അന്തർ സംസ്ഥാന സർവീസിന് ഒരുങ്ങുന്നത്. കോഴിക്കോട്-ബംഗളൂരു റൂട്ടിൽ ആയിരിക്കും ‘ഗരുഡ പ്രീമിയം’ സർവീസ് നടത്തുക.
മെയ് അഞ്ച് ഞായറാഴ്ച മുതലാണ് ബസ് സർവീസ് ആരംഭിക്കുന്നത്. ആധുനിക രീതിയിൽ നിർമ്മിച്ച് എയർകണ്ടീഷൻ ചെയ്തിട്ടുള്ള ആഡംബര ബസ് ആണ് ഇത്. 26 പുഷ്ബാക്ക് സീറ്റുകൾ ആണ് ബസ്സിൽ ഉള്ളത്. ഭിന്നശേഷിക്കാർക്കും മുതിർന്ന പൗരന്മാർക്കും ബസ്സിൽ കയറാനായി യാത്രക്കാർക്ക് തന്നെ ഓപ്പറേറ്റ് ചെയ്യാൻ കഴിയുന്ന ഹൈഡ്രോളിക് ലിഫ്റ്റും ഈ ബസിന്റെ സവിശേഷതയാണ്.
രാവിലെ നാലുമണിക്ക് കോഴിക്കോട് നിന്നും യാത്ര തിരിച്ച് കൽപ്പറ്റ, സുൽത്താൻബത്തേരി, ഗുണ്ടൽപേട്ട്, മൈസൂർ വഴി രാവിലെ 11:35ന് ബസ് ബംഗളൂരുവിൽ എത്തും. തുടർന്ന് ഉച്ചയ്ക്ക് 2:30 ന് ഇതേ റൂട്ടിലൂടെ തന്നെ തിരികെ കോഴിക്കോട് എത്തിച്ചേരുന്ന രീതിയിലാണ് ബസ് ട്രിപ്പ് ഷെഡ്യൂൾ ചെയ്തിട്ടുള്ളത്. 1171 രൂപയാണ് സെസ് അടക്കം യാത്രയ്ക്കുള്ള ടിക്കറ്റ് നിരക്ക്. ഇത് കൂടാതെ എസി ബസുകൾക്കുള്ള 5% ലക്ഷ്വറി ടാക്സും നൽകേണ്ടതാണ്. ഓൺലൈൻ റിസർവേഷൻ സൗകര്യവും ലഭ്യമാക്കിയിട്ടുണ്ട്.
Discussion about this post