കുഴിപ്പുറം കവലയിൽ അമിതവേഗതയിലെത്തിയ കാർ സ്‌കൂട്ടറിലിടിച്ച് അധ്യാപകൻ ദാരുണമായി കൊല്ലപ്പെട്ട സംഭവത്തിൽ കാർ ഡ്രൈവർ മദ്യലഹരിയിലായിരുന്നൂവെന്ന് പോലീസ് വ്യക്തമാക്കി. ഞായറാഴ്ച രാത്രി 10 മണിയോടെയാണ് നാടിനെ നടുക്കിയ ഈ അപകടം നടന്നത്. അപകടത്തിൽ മഞ്ചേരി നോബിൾ കോളേജിലെ അധ്യാപകനും കുഴിപ്പുറം സ്വദേശിയുമായ അമ്പലവൻ കുളപ്പുരയ്ക്കൽ ഷറഫുദ്ദീൻ (36) ആണ് മരിച്ചത്. ഒപ്പമുണ്ടായിരുന്ന സുഹൃത്ത് കുഴിപ്പുറം കോടായിക്കാടൻ ഹബീബിന് ഗുരുതരമായി പരിക്കേറ്റിട്ടുണ്ട്.
അപകടമുണ്ടാക്കിയ കാറിന്റെ ഡ്രൈവറായ പറപ്പൂർ സ്വദേശി ചേലപ്പുറത്ത് അക്ബറലിയെ (36) പോലീസ് അറസ്റ്റ് ചെയ്തിട്ടുണ്ട്. പ്രതിക്കെതിരെ പോലീസ് നരഹത്യയ്ക്ക് കേസെടുത്തിട്ടുണ്ട്. അമിതവേഗതയിലെത്തിയ കാർ സ്‌കൂട്ടറിലേക്ക് ഇടിച്ചുകയറുകയായിരുന്നുവെന്നും ഇടിയുടെ ആഘാതത്തിൽ സ്‌കൂട്ടർ പൂർണമായും തകർന്നുപോയെന്നും പോലീസ് അറിയിച്ചു. അപകടത്തിന് തൊട്ടുപിന്നാലെ നാട്ടുകാർ ചേർന്ന് ആശുപത്രിയിലെത്തിച്ചെങ്കിലും ഷറഫുദ്ദീന്റെ ജീവൻ രക്ഷിക്കാനായില്ല. അദ്ദേഹത്തിന്റെ മൃതദേഹം മുണ്ടോത്ത്പറമ്പ് സ്‌കൂളിൽ പൊതുദർശനത്തിന് വെച്ചശേഷം വൈകീട്ടോടെ കുഴിപ്പുറം പടിഞ്ഞാറേ ജുമാമസ്ജിദ് ഖബർസ്ഥാനിൽ കബറടക്കി. ഹബീബ ബുഷ്‌റയാണ് ഷറഫുദ്ദീന്റെ ഭാര്യ. അയ്ദിൻ റൂമി, അലിയ എന്നിവരാണ് മക്കൾ.
അതേസമയം, മരണത്തിന് തൊട്ടുമുമ്പ് അദ്ദേഹം തന്റെ വാട്‌സാപ്പ് സ്റ്റാറ്റസിൽ പങ്കുവെച്ച ഒരു കുറിപ്പ് ഏവരേയും നൊമ്പരപ്പെടുത്തുകയാണ്. ‘മദ്യപിച്ച് വാഹനമോടിക്കുന്നത് അപകടമല്ല, കൊലപാതകമാണ്’ എന്നായിരുന്നു ഷറഫുദ്ദീൻ തന്റെ വാട്സാപ്പിൽ കുറിച്ചിരുന്നത്. മണിക്കൂറുകൾക്കകമാണ് മദ്യപിച്ചെത്തിയ ഡ്രൈവർ ഓടിച്ച കാറിടിച്ച് അദ്ദേഹം ദാരുണമായി കൊല്ലപ്പെട്ടത്.
