ന്യൂഡൽഹി: ഡൽഹിയിലെ അൻപതോളം സ്‌കൂളുകൾക്കും നോയിഡയിലെ ഒരു സ്‌കൂളിനും ബോംബ് ഭീഷണി. ഇന്ന് രാവിലെയോടെ ഇമെയിൽ മുഖേനെയാണ് ഭീഷണി സന്ദേശം വന്നത്. ഇതേതുടർന്ന് സ്‌കൂളുകളിലെത്തിയ മുഴുവൻ വദ്യാർത്ഥികളെയും സ്‌കൂൾ അധികൃതരും പോലീസും ചേർന്ന് വീടുകളിലേയ്ക്ക് തിരിച്ചയച്ചു.
ഡൽഹി പബ്ലിക്ക് സ്‌കൂൾ (ഡിപിഎസ്) ദ്വാരക, മദർ മേരി സ്‌കൂൾ ഈസ്റ്റ് മായൂർ വിഹാർ, സൻസ്‌കൃതി സ്‌കൂൾ, അമിതി സ്‌കൂൾ പുഷ്പ വിഹാർ എന്നിവ ഉൾപ്പെടെയുള്ള ഡൽഹിയിലെ സ്‌കൂളുകളിലേയ്ക്കാണ് സന്ദേശമെത്തിയതെന്ന് ഡെൽഹി പോലീസ് പറഞ്ഞു. ഡിപിഎസ് നോയിഡയിലേയ്ക്കും ഇത്തരത്തിൽ ഭീഷണി സന്ദേശമെത്തിയിട്ടുണ്ട്. രാവിലെ ആറ് മണിയോടെയാണ് സന്ദേശമെത്തിയത്. ബോംബ് സ്‌ക്വാഡും ഫയർ ഫോഴ്‌സും സ്ഥലത്തെത്തിയിട്ടുണ്ട്.
സ്‌കൂളുകളിൽ വ്യാപകമായി പരിശോധനകൾ നടത്തിയെങ്കിലും സംശയാസ്പദമായി ഒന്നും കണ്ടെത്താനായില്ല. ഇ മെയിൽ വന്നതിന്റെ ഐപി അഡ്രസ് കേന്ദ്രീകരിച്ചാണ് അന്വേഷണം പുരോഗമിക്കുന്നത്.
