എറണാകുളം : കൊച്ചി ബിപിസിഎൽ പ്ലാന്റിൽ ഡ്രൈവർമാരുടെ മിന്നൽ പണിമുടക്ക്. അപ്രതീക്ഷിതമായി ഡ്രൈവർമാർ പണിമുടക്കിയതിനെ തുടർന്ന് പ്ലാന്റിൽ നിന്നുമുള്ള ഗ്യാസ് വിതരണം പൂർണ്ണമായി നിലച്ചിരിക്കുന്ന അവസ്ഥയിലാണ്. 200 ലോറി ഡ്രൈവർമാരാണ് മിന്നൽ പണിമുടക്കിൽ പങ്കെടുക്കുന്നത്. സംസ്ഥാനത്തെ 7 ജില്ലകളിലേക്കുള്ള സിലിണ്ടറുകളുടെ വിതരണം ആണ് നിലച്ചത്.
കൂലി തർക്കത്തെ തുടർന്ന് യൂണിയൻ പ്രവർത്തകർ മർദ്ദിച്ചു എന്ന് ആരോപിച്ചാണ് 200 ലോറി ഡ്രൈവർമാർ പണിമുടക്ക് നടത്തുന്നത്. കഴിഞ്ഞ ദിവസം തൃശൂർ കൊടകരയിലെ സ്വകാര്യ ഏജൻസിയിൽ ലോഡ് ഇറക്കിയതുമായി ബന്ധപ്പെട്ടാണ് കൂലി തർക്കം ഉണ്ടായത്. ഇവിടെ ലോഡ് ഇറക്കാൻ ചെന്നിരുന്ന ഡ്രൈവർ ശ്രീകുമാറിന് യൂണിയൻ പ്രവർത്തകരിൽ നിന്നും മർദ്ദനമേറ്റിരുന്നു.
യൂണിയൻ പ്രവർത്തകരുടെ മർദ്ദനത്തിൽ ഗുരുതര പരിക്കേറ്റ ശ്രീകുമാർ എറണാകുളത്തെ സ്വകാര്യ ആശുപത്രിയിൽ ചികിത്സയിലാണ്. അടികൊണ്ട് താഴെ വീണ ശ്രീകുമാറിനെ പിന്നെയും യൂണിയൻ പ്രവർത്തകർ മർദ്ദിക്കുന്നതിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. ഈ സംഭവത്തിൽ പ്രതിഷേധിച്ചാണ് ലോറി ഡ്രൈവർമാർ മിന്നൽ പണിമുടക്ക് നടത്തുന്നത്. ലോഡുമായി പോകുന്ന ഡ്രൈവർമാർക്ക് മതിയായ സംരക്ഷണം നൽകണമെന്ന് സർക്കാരിനോട് ആവശ്യപ്പെടാൻ ലോറി ഡ്രൈവർമാരുടെ സംയുക്ത സംഘടന തീരുമാനിച്ചിട്ടുണ്ട്.
Discussion about this post