ന്യൂഡൽഹി: അഴിമതി കേസിൽ അറസ്റ്റിലായിട്ടും ആത്മവീര്യം ചോരാതെ ഡൽഹി മുഖ്യമന്ത്രി അരവിന്ദ് കെജ്രിവാൾ. അടുത്ത നിയമസഭാ തിരഞ്ഞെടുപ്പിൽ മുഴുവൻ സീറ്റും ആംആദ്മി നേടുമെന്ന് കെജ്രിവാൾ പറഞ്ഞു. ദേശീയ മാദ്ധ്യമത്തിന് നൽകിയ അഭിമുഖത്തിൽ ആയിരുന്നു അദ്ദേഹത്തിന്റെ പ്രതികരണം.
ഡൽഹി നിയമസഭയിൽ 70 സീറ്റുകളാണ് ഉള്ളത്. താൻ ജയിലിൽ ആണെങ്കിലും 70 ൽ 70 സീറ്റുകളും ആംആദ്മി സ്വന്തമാക്കും. തനിക്ക് വേണ്ടി ഒരിക്കലും ഭാര്യ മത്സരിക്കില്ല. ജയിലിൽ ആണെങ്കിലും താൻ മത്സരിക്കും. തങ്ങളുടെ എല്ലാ എംഎൽഎമാരെയും ജയിലിൽ അടയ്ക്കൂ. എന്നിട്ട് തിരഞ്ഞെടുപ്പ് സംഘടിപ്പിക്കൂ. ജനങ്ങൾ മണ്ടന്മാർ ആണെന്നാണോ കരുതുന്നത്. ആളുകൾ എല്ലാം കാണുന്നുണ്ടെന്നും കെജ്രിവാൾ വ്യക്തമാക്കി.
തന്നെ മുഖ്യമന്ത്രി സ്ഥാനത്ത് നിന്നും മാറ്റുകയാണ് പ്രധാനമന്ത്രിയുടെ ലക്ഷ്യം. ഇത് തനിക്ക് അറിയാവുന്നത് കൊണ്ടാണ് താൻ പദവി രാജിവയ്ക്കാത്തത്. ഡൽഹിയിൽ തന്നെ തോൽപ്പിക്കാൻ കഴിയില്ലെന്ന് പ്രധാനമന്ത്രിയ്ക്ക് അറിയാം. താൻ രാജിവച്ചാൽ ഇവർ അടുത്തതായി ഉന്നമിടുക മമത ബാനർജിയെയും പിണറായി വിജയനെയുമാകും. തനിക്ക് അധികാരത്തോട് ആർത്തിയില്ല. എങ്കിലും രാജിവയ്ക്കില്ല. കാരണം അത് ജനാധിപത്യത്തെ ബാധിക്കുമെന്നും അദ്ദേഹം കൂട്ടിച്ചേർത്തു.
Discussion about this post