ശ്രീനഗർ: ലോകത്തിലെ ഏറ്റവും വലിയ റെയിൽവേ പാലമായ ചെനാബ് റെയിൽവേ പാലത്തിലൂടെ തീവണ്ടി സർവ്വീസ് ഉടൻ ആരംഭിക്കും. നോർതേൺ റെയിൽവേയാണ് ഇക്കാര്യം പുറത്തുവിട്ടത്. ലോകത്തിലെ എട്ടാമത്തെ അത്ഭുതമാണ് ചെനാബ് റെയിൽവേ പാലം.
രാംബാനിൽ നിന്നും ബാരാമുള്ളയിലേക്കാണ് പാലത്തിലൂടെയുള്ള തീവണ്ടി സർവ്വീസ്. അടുത്തിടെ പാലത്തിലെ പരിശോധന അധികൃതർ പൂർത്തിയാക്കിയിരുന്നു. ഇതിന് പിന്നാലെയാണ് തീവണ്ടി സർവ്വീസ് ഉടൻ ആരംഭിക്കുമെന്ന വിവരം പുറത്തുവിട്ടത്.
തീവണ്ടി സർവ്വീസ് ആരംഭിക്കുന്ന തിയതി തീരുമാനിച്ചിട്ടില്ലെന്നും, അധികം വൈകാതെ തന്നെ ആ ദിവസം വന്നെത്തുമെന്നും റിയാസി ഡെപ്യൂട്ടി കമ്മീഷണർ വിശേഷ് മഹാജൻ പറഞ്ഞു. ആധുനിക ലോകത്തെ എൻജിനീയർമാരുടെ അത്ഭുതമാണ് ചെനാബ് പാലമെന്ന് . റിയാസി ജില്ലയിൽ ട്രെയിൻ എത്തുന്ന ആദ്യ ദിനം വലിയ മാറ്റത്തിന്റെ കൂടിയാകും. നമ്മളെ സംബന്ധിച്ചിടത്തോളം അഭിമാനത്തിന്റെ നിമിഷമാണ്. നമ്മുടെ എൻജിനീയർമാർ വലിയ അത്ഭുതമാണ് നിർമ്മിച്ചിരിക്കുന്നത്. എട്ടാമത്തെ ലോകാത്ഭുതം ആണ് ചെനാബ് പാലമെന്നും അദ്ദേഹം കൂട്ടിച്ചേർത്തു.
ജമ്മു കശ്മീരിന്റെ റെയിൽവേ പദ്ധതിയിൽ ഉൾപ്പെടുന്ന ഉധംപൂർ- ശ്രീനഗർ- ബാരാമുള്ള സെക്ഷന്റെ ഭാഗമായിട്ടാണ് ചെനാബ് പാലം നിർമ്മിച്ചത്. ജമ്മു കശ്മീരിൽ റെയിൽവേയുടെ സ്വാധീനം ശക്തമാക്കുന്നതിന്റെ ഭാഗമായിട്ടാണ് പദ്ധതി നടപ്പിലാക്കുന്നത്. ഈ വർഷം അവസാനത്തോടെ പദ്ധതി പൂർത്തിയാകുമെന്നാണ് സൂചന.
ജമ്മു കശ്മീരിലെ കത്രയ്ക്കും ബനിഹാലിനും ഇടയിലായി ചെനാബ് നദിയ്ക്ക് കുറുകെയാണ് പാലം നിർമ്മിച്ചിട്ടുള്ളത്. 359 മീറ്ററാണ് പാലത്തിന്റെ ഉയരം. പാരിസിന്റെ ഇഫിൽ ടവറിനെക്കാൾ ചെനാബ് പാലത്തിന് 35 മീറ്റർ ഉയരം കൂടുതലാണ്. ഇതോടെയാണ് ചെനാബ് പാലം ലോകത്തെ എട്ടാമത്തെ അത്ഭുതം ആയത്. 1,315 മീറ്ററാണ് പാലത്തിന്റെ നീളം. ആർച്ച് മാതൃകയിൽ ആണ് പാലം നിർമ്മിച്ചിരിക്കുന്നത്. 2017 ൽ ആരംഭിച്ച പാലത്തിന്റെ നിർമ്മാണത്തിനായി 1250 കോടി രൂപയായിരുന്നു ചിലവായത്. ഭീകരാക്രമണങ്ങളെയും ഭൂചലനത്തെയും അതിജീവിക്കാൻ കഴിയുന്ന തരത്തിലാണ് പാലത്തിന്റെ നിർമ്മാണം.
