ആലപ്പുഴ : മാവേലിക്കരയിൽ വീടിന്റെ കോൺക്രീറ്റ് തകർന്നുവീണുണ്ടായ അപകടത്തിൽ രണ്ടുപേർ മരിച്ചു. നിർമ്മാണ തൊഴിലാളികളായ രണ്ടുപേരാണ് അപകടത്തിൽ മരിച്ചത് തഴക്കരയിൽ പുതുതായി നിർമ്മിച്ചു കൊണ്ടിരിക്കുന്ന വീടിന്റെ തട്ടുപൊളിക്കുന്നതിനിടെ കോൺക്രീറ്റ് മേൽക്കൂര തകർന്നു വീഴുകയായിരുന്നു.
ചെട്ടിക്കുളങ്ങര സ്വദേശി സുരേഷ് (52), മാവേലിക്കര പുതുച്ചിറയിൽ ആനന്ദൻ (55) എന്നിവരാണ് മരിച്ചത്. മറ്റൊരു നിർമ്മാണ തൊഴിലാളിക്ക് പരിക്കേറ്റിട്ടുമുണ്ട്. വെള്ളിയാഴ്ച ഉച്ചയ്ക്ക് ശേഷം ആയിരുന്നു അപകടം നടന്നത്. ഉടൻതന്നെ അഗ്നിരക്ഷാസേന സ്ഥലത്തെത്തിയാണ് രക്ഷാപ്രവർത്തനത്തിന് നേതൃത്വം നൽകിയത്.
തൊഴിലാളികൾ രണ്ടുപേരും സംഭവ സ്ഥലത്ത് വെച്ച് തന്നെ മരിച്ചിരുന്നു. സംഭവത്തെക്കുറിച്ച് വിശദമായ അന്വേഷണം നടത്തുമെന്നും മതിയായ സുരക്ഷാ ക്രമീകരണങ്ങൾ ഉണ്ടായിരുന്നോ എന്നുള്ള കാര്യം പരിശോധിക്കുമെന്നും പോലീസ് അറിയിച്ചു.
Discussion about this post