മുംബൈ: മഹാരാഷ്ട്ര മുന്മന്ത്രിയായ ബാബാ സിദ്ദിഖിന്റെ കൊലയാളികള്ക്ക് അധോലോകസംഘവുമായി അടുത്ത ബന്ധമെന്ന് സ്ഥിരീകരിച്ചതായി പൊലീസ്. ലോറന്സ് ബിഷ്ണോയിയുടെ സംഘവുമായി ചേര്ന്ന് പ്രവര്ത്തിക്കുന്നവരാണ് ഇവരെന്നാണ് വിവരം. തിരഞ്ഞെടുപ്പ് നടക്കാന് ദിവസങ്ങള് മാത്രം ബാക്കിനില്ക്കെ നടന്ന എന്.സി.പി നേതാവിന്റെ കൊലപാതകം സുരക്ഷാ ആശങ്കകളും ഉയര്ത്തുന്നുണ്ട്.
ശനിയാഴ്ച രാത്രി ഈസ്റ്റ് ബാന്ദ്രയില് വെച്ചാണ് ബാബ സിദ്ദിഖിന് വെടിയേല്ക്കുന്നത്. ഓഫീസില് നിന്നിറങ്ങി കാറിനടുത്തേക്ക് നടക്കുമ്പോള് ആക്രമികള് വെടിയുതിര്ക്കുകയായിരുന്നു. അദ്ദേഹത്തിന് നേരെയുതിര്ത്ത ആറ് വെടിയുണ്ടകളില് നാലെണ്ണം നെഞ്ചിലാണ് കൊണ്ടത്. ബാബ സിദ്ദിഖിയെ കൊലപ്പെടുത്താന് കഴിഞ്ഞ ഒരുമാസമായി പദ്ധതിയിട്ട് കാത്തിരിക്കുകയാണെന്ന വിവരം പിടിയിലായവരില് നിന്ന് പോലീസിന് ലഭിച്ചിട്ടുണ്ട്. അക്രമികള് രാത്രിയില് ഓട്ടോറിക്ഷയിലാണ് ബാന്ദ്രയിലെത്തിയതെന്ന വിവരം പോലീസിന് ലഭിച്ചിരുന്നു. ഹരിയാന, ഉത്തര്പ്രദേശ് സ്വദേശികളായ കര്ണാലി സിങ്, ധര്മരാജ് കശ്യപ് എന്നിവരെ പോലീസ് അറസ്റ്റ് ചെയ്തിട്ടുണ്ട്. നാലംഗ സംഘമാണ് കൊലപാതകത്തിന് പദ്ധതിയിട്ടത്. രണ്ട് പേര്ക്കുവേണ്ടിയുള്ള അന്വേഷണം തുടരുകയാണ്.
കൊലപാതകം നടത്താന് സംഘത്തിന് പണം മുന്കൂറായി ലഭിച്ചിരുന്നു. മൂന്ന് ലക്ഷം രൂപയാണ് മുന്കൂറായി നല്കിയത്. ദിവസങ്ങള്ക്ക് മുന്പേ തന്നെ തോക്കും ലഭിച്ചതായി പോലീസ് വ്യക്തമാക്കി. കൊലപാതകം നടത്തുന്നതിന്റെ ഭാഗമായി കഴിഞ്ഞ രണ്ട് മാസമായി ബാന്ദ്രയില് 14000 രൂപ വാടകയുള്ള വീടെടുത്ത് താമസിക്കുകയായിരുന്നു ഈ നാലംഗ സംഘമെന്നും പൊലീസ് പറയുന്നു.
ലോറന്സ് ബിഷ്ണോയിയുമായി ബന്ധപ്പെട്ട സംഘം, ചേരി പുനരധിവാസ കേസ് എന്നിങ്ങനെ രണ്ട് ദിശകളിലായാണ് പോലീസ് പ്രാഥമിക അന്വേഷണം നടത്തുന്നത്. ധാരാളം ക്രിമിനല് കേസുകളില് പ്രതിയായ ലോറന്സ് ബിഷ്ണോയി നിലവില് ഗുജറാത്തിലെ ജയിലിലാണുള്ളത്. സല്മാന് ഖാനുമായി ബാബ സിദ്ദിഖിനുള്ള അടുത്ത ബന്ധമാണ് ബിഷ്ണോയി സംഘത്തിന്റെ വൈരാഗ്യത്തിന്റെ കാരണമെന്നാണ് സൂചനകള്.
Discussion about this post