കോഴിക്കോട് : ക്ലാസിൽ സംസാരിച്ചതിന് വിദ്യാർത്ഥിയെ മർദ്ദിച്ച അധ്യാപകനെതിരെ പരാതി. കോഴിക്കോട് മേപ്പയ്യൂർ ഗവ. ഹയർ സെക്കൻഡറി സ്‌കൂളിലെ ഒമ്പതാം ക്ലാസ് വിദ്യാർത്ഥിക്കാണ് അധ്യാപകന്റെ മർദ്ദനത്തെ തുടർന്ന് പരിക്കേറ്റത്. ഹൈസ്‌കൂൾ വിഭാഗം ഗണിത അധ്യാപകൻ കെ സി അനീഷിനെതിരെയാണ് വിദ്യാർത്ഥിയുടെ രക്ഷാകർത്താക്കൾ പരാതി നൽകിയിട്ടുള്ളത്.
സംഭവത്തെ തുടർന്ന് അധ്യാപകനെ അന്വേഷണ വിധേയമായി സസ്‌പെൻഡ് ചെയ്തു. കോഴിക്കോട് ഡിഡിഇ സി മനോജ് കുമാർ ആണ് നടപടി എടുത്തത്. 14 ദിവസത്തേക്കാണ് സസ്പെൻഷൻ. ഒമ്പതാം ക്ലാസ് വിദ്യാർത്ഥിയായ അലൻ ഷൈജുവിന്റെ പിതാവാണ് അധികൃതർക്ക് പരാതി നൽകിയത്. മർദ്ദനത്തിൽ അലന് തോളെല്ലിന് പരിക്കേറ്റെന്നും പരാതിയിൽ പറഞ്ഞിരുന്നു.
വിദ്യാർത്ഥിയുടെ പിതാവിന്റെ പരാതിയെ തുടർന്ന് വടകര എഇഒ സംഭവത്തെക്കുറിച്ച് അന്വേഷണം നടത്തി. പ്രാഥമിക അന്വേഷണത്തിൽ അധ്യാപകനിൽ നിന്ന് വിദ്യാർത്ഥിയ്ക്ക് മർദ്ദനമേറ്റതായി സ്ഥിരീകരിച്ചു. ക്ലാസ് നടക്കുന്നതിനിടയിൽ സമീപത്ത് ഇരുന്ന കുട്ടിയുമായി സംസാരിച്ചതിനാണ് അനീഷ് അലനെ മർദ്ദിച്ചത്.
Discussion about this post