എറണാകുളം : നവകേരള യാത്രക്കിടെ മുഖ്യമന്ത്രി പിണറായി വിജയൻ നടത്തിയ രക്ഷാപ്രവർത്തന പരാമർശത്തിൽ കേസെടുക്കാൻ കഴിയില്ലെന്ന് പോലീസ്. മുഖ്യമന്ത്രിക്കെതിരെ കേസെടുക്കാൻ വകുപ്പില്ലെന്ന നിലപാട് നാളെ കോടതിയെ അറിയിക്കും. കൊച്ചി സിറ്റി പോലീസ് ആണ് നാളെ കോടതിയിൽ റിപ്പോർട്ട് സമർപ്പിക്കുക.
കണ്ണൂരിൽ യൂത്ത് കോൺഗ്രസ് പ്രവർത്തകരെ മർദ്ദിച്ച സംഭവവുമായി ബന്ധപ്പെട്ട രക്ഷാപ്രവർത്തന പരാമർശത്തിലാണ് മുഖ്യമന്ത്രിക്കെതിരെ കേസെടുക്കാൻ വകുപ്പില്ലെന്ന് പോലീസ് വ്യക്തമാക്കിയത്. ഈ വിഷയത്തിൽ മുഖ്യമന്ത്രിക്കെതിരെ അന്വേഷണം നടത്താൻ എറണാകുളം സി ജെ എം കോടതി നേരത്തെ ഉത്തരവിട്ടിരുന്നു.
എറണാകുളം ഡിസിസി പ്രസിഡൻറ് മുഹമ്മദ് ഷിയാസ് നൽകിയ പരാതിയുടെ അടിസ്ഥാനത്തിലായിരുന്നു വിശദമായ അന്വേഷണത്തിന് എറണാകുളം സി ജെ എം കോടതി ഉത്തരവിട്ടത്.
യൂത്ത് കോൺഗ്രസ് പ്രവർത്തകനെ ചെടിച്ചട്ടി അടക്കം ഉപയോഗിച്ച് മർദ്ദിച്ച സംഭവത്തെ രക്ഷാപ്രവർത്തനം എന്ന് വിശേഷിപ്പിച്ച മുഖ്യമന്ത്രി, രക്ഷാപ്രവർത്തനം തുടരാം എന്ന് പ്രസ്താവിച്ചത് കുറ്റകൃത്യത്തിനുള്ള പ്രേരണയാണെന്നായിരുന്നു ഷിയാസിന്റെ ഹർജി.
Discussion about this post