ചണ്ഡീഗഢ്: മദ്യവും ഡി.ജെ പാര്‍ട്ടിയുമില്ലാതെ നടത്തുന്ന കല്യാണ ആഘോഷങ്ങള്‍ക്ക് സമ്മാനവുമായി പഞ്ചാബിലെ ഒരു ഗ്രാമപഞ്ചായത്ത്. ബത്തിന്‍ഡ ജില്ലയിലെ ബാലോ ഗ്രാമമാണ് ഇത്തരം പ്രവണതകള്‍ക്കെതിരേ രംഗത്തെത്തിയിരിക്കുന്നത്. മദ്യവും ഡി.ജെ പാര്‍ട്ടിയുമില്ലാത്ത നടത്തപ്പെടുന്ന കല്യാണ ആഘോഷങ്ങള്‍ക്കായി 21,000 രൂപ സമ്മാനം നല്‍കുമെന്നാണ് പ്രഖ്യാപനം.
ഇതുവഴി കല്യാണത്തിനായുള്ള അനാവശ്യ ചെലവുകള്‍ ഒഴിവാക്കുന്നതിന് ഗ്രാമവാസികളെ പ്രോത്സാഹിപ്പിക്കുന്നതിന് വേണ്ടിയാണ് സമ്മാനം പ്രഖ്യാപിച്ചിരിക്കുന്നത്. കൂടാതെ മദ്യപാനമുള്‍പ്പെടെയുള്ള സാമൂഹ്യ വിപത്തുകളെ ഒഴിവാക്കുന്നതും ലക്ഷ്യമാണെന്ന് ഗ്രാമപഞ്ചായത്ത് അധ്യക്ഷ അമര്‍ജിത് കൗര്‍ പറയുന്നു.
പല കല്യാണ ആഘോഷങ്ങളിലും മദ്യപാനികള്‍ പ്രശ്‌നങ്ങളുണ്ടാകുന്നത് പതിവാണ്. അതുപോലെ തന്നെ ഡി.ജെ പാര്‍ട്ടിയില്‍ ഉയര്‍ന്ന ശബ്ദത്തില്‍ പാട്ടുകള്‍ വെയ്ക്കുന്നത് ശബ്ദമലിനീകരണത്തിനൊപ്പം കുട്ടികളുടെ പഠനത്തെയും ബാധിക്കുന്നു. ഇത്തരം പ്രശ്‌നങ്ങള്‍ പരിഹരിക്കുക എന്ന ലക്ഷ്യവും ഇതിന് പിന്നിലുണ്ട്.
മദ്യവും ഡി.ജെ പാര്‍ട്ടിയുമില്ലാത്ത കല്യാണ ആഘോഷങ്ങള്‍ക്ക് 21,000 രൂപ സമ്മാനം നല്‍കുന്നതിനുള്ള പ്രമേയം ഗ്രാമപഞ്ചായത്ത് പാസാക്കിക്കഴിഞ്ഞു. 5,000 പേരാണ് ബാലോ ഗ്രാമത്തില്‍ വസിക്കുന്നത്.
Discussion about this post