കൊളംബോ: ഹോസ്റ്റലിലെ മൂട്ടശല്യം തുരത്താനായി പുക പ്രയോഗം നടത്തിയതിന് പിന്നാലെ ജീവന്‍ നഷ്ടമായത് രണ്ടുപേര്‍ക്ക് . ഇവിടെ താമസിച്ചിരുന്ന രണ്ട് വിദേശ വിനോദ സഞ്ചാരികള്‍ക്കാണ് ദാരുണാന്ത്യം സംഭവിച്ചത്. ശ്രീലങ്കയിലെത്തിയ ജര്‍മന്‍, ബ്രിട്ടന്‍ സ്വദേശികളായ യുവതികള്‍ക്കാണ് അനധികൃതമായ കീടനാശിനി പ്രയോഗത്തിലൂടെ ജീവന്‍ നഷ്ടമായത്. ഇംഗ്ലണ്ടിലെ ഡെര്‍ബി സ്വദേശിയായ 24കാരി എബോണി മക്‌റ്റോന്‍ഷ്, ജര്‍മന്‍കാരിയായ 26 നദീന്‍ റാഗുസേ എന്നിവരാണ് മരിച്ചത്.
കൊളംബോയിലെ മിറക്കിള്‍ കൊളംബോ സിറ്റി എന്ന ഹോസ്റ്റലിലായിരുന്നു ഇവര്‍ താമസിച്ചിരുന്നത്. ശനിയാഴ്ച ഹോസ്റ്റല്‍ അധികൃതര്‍ മൂട്ടശല്യം ഒഴിവാക്കാനായി കീടനാശിനി ഉപയോഗിച്ച് ഹോസ്റ്റലില്‍ പുകച്ചിരുന്നു. ഇതിന് പിന്നാലെ ശാരീരികാസ്വാസ്ഥ്യം നേരിട്ട ഇരുവരേയും ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
ഈ സംഭവത്തില്‍ നിലവില്‍ പൊലീസ് അന്വേഷണം പുരോഗമിക്കുകയാണ്. ഇരുവരുടേയും മൃതദേഹങ്ങള്‍ ബന്ധുക്കളെത്തുന്നതിന് പിന്നാലെ പോസ്റ്റ്‌മോര്‍ട്ടം ചെയ്യുമെന്നും പൊലീസ് വിശദമാക്കി. സംഭവത്തിന് പിന്നാലെ അടച്ച ഹോസ്റ്റല്‍ പോസ്റ്റ്‌മോര്‍ട്ടം റിപ്പോര്‍ട്ട് വന്ന ശേഷം മാത്രമേ പ്രവര്‍ത്തനാനുമതിയുടെ കാര്യത്തില്‍ തീരുമാനം എടുക്കൂവെന്നും അധികൃതര്‍ വിശദമാക്കി.
ചൊവ്വാഴ്ചയാണ് എബോണി വിനോദസഞ്ചാരത്തിനായി ശ്രീലങ്കയിലെത്തിയത്. തെക്കന്‍ ഏഷ്യ മുഴുവന്‍ യാത്ര ചെയ്യണമെന്ന ആഗ്രഹത്തിന്റെ ഭാഗമായിരുന്നു സോഷ്യല്‍ മീഡിയ മാനേജറും ഡിജിറ്റല്‍ മാര്‍ക്കറ്റിംഗ് ജീവനക്കാരിയുമായ എബോണിയുടെ യാത്ര. പുകപ്രയോഗം നടത്തിയതിന് പിന്നാലെ ഹോസ്റ്റലിലുണ്ടായിരുന്ന മറ്റ് ആളുകള്‍ക്കും ആരോഗ്യ പ്രശ്‌നങ്ങള്‍ ആരംഭിച്ചതിന് പിന്നാലെ ചികിത്സ തേടിയിട്ടുണ്ട്. ശ്വാസ തടസം, ഛര്‍ദ്ദി, തലകറക്കം മുതലായ ലക്ഷണങ്ങളാണ് പലര്‍ക്കും അനുഭവപ്പെട്ടത്.
Discussion about this post