30 വയസ്സിനുള്ളിൽ തന്നെ വിപ്ലവകരമായ സംരംഭങ്ങൾ ആരംഭിച്ച് വിജയം കുറിച്ച 30 സംരംഭകരുടെ പട്ടിക പുറത്തുവിട്ട് ഫോർബ്സ്. ഫോർബ്സ് ഇന്ത്യ 30 അണ്ടർ 30 പട്ടികയിൽ ഇന്ത്യയിൽ നിന്നുള്ള 30 യുവ സംരംഭകരാണ് ഉള്ളത്. കേരളത്തിൽ നിന്നുള്ള രണ്ട് സംരംഭകരും പട്ടികയിൽ ഇടം നേടിയിട്ടുണ്ട്. കൂടാതെ വിനോദ വ്യവസായത്തിന് നൽകിയ സംഭാവനകൾക്ക് നടി അപർണ ബാലമുരളിയും ഫോർബ്സ് പട്ടികയിൽ ഇടം പിടിച്ചു. 29 വയസ്സിനുള്ളിൽ ദേശീയ അവാർഡ് അടക്കമുള്ള പുരസ്കാര നേട്ടങ്ങൾ സ്വന്തമാക്കിയതിനാണ് അപർണ ബാലമുരളിക്ക് അംഗീകാരം നൽകിയിരിക്കുന്നത്.
അഗ്രിടെക് മേഖലയില് പ്രവര്ത്തിക്കുന്ന ഫ്യൂസലേജ് കമ്പനിയുടെ സ്ഥാപകനും മാനേജിംഗ് ഡയറക്ടറുമായ ദേവന് ചന്ദ്രശേഖരൻ ആണ് ഫോർബ്സ് ഇന്ത്യ 30 അണ്ടർ 30 പട്ടികയിൽ ഇടം പിടിച്ചിട്ടുള്ള മലയാളികളിൽ ഒരാൾ. 2018ൽ കേരളത്തിലുണ്ടായ പ്രളയത്തിനുശേഷം വ്യാപകമായി ഉണ്ടായ വിളവ് കുറവ് പരിഹരിക്കുന്നതിന്റെ ഭാഗമായാണ് ദേവൻ ചന്ദ്രശേഖരനും സഹോദരിയായ ദേവിക ചന്ദ്രശേഖരനും സുഹൃത്ത് അതുൽ ചന്ദ്രനും ചേർന്ന് ഫ്യൂസലേജ് എന്ന സംരംഭം ആരംഭിക്കുന്നത്. കൊച്ചി ആസ്ഥാനമായാണ് കമ്പനി പ്രവർത്തിക്കുന്നത്.
ഡ്രോൺ സാങ്കേതികവിദ്യ ഉപയോഗിച്ച് വിളകൾക്ക് മികച്ച പരിപാലനം നൽകുകയും കൂടുതൽ വിളവ് സൃഷ്ടിക്കുകയും ആണ് ഫ്യൂസലേജ് ചെയ്യുന്നത്. വായ്പയെടുത്ത ഏഴര ലക്ഷം രൂപ കൊണ്ടായിരുന്നു ദേവൻ ചന്ദ്രശേഖരന്റെ നേതൃത്വത്തിൽ ഈ കമ്പനി സ്ഥാപിച്ചത്. പിന്നീട് കേരള സ്റ്റാര്ട്ടപ്പ് മിഷന്റെയും മറ്റ് സര്ക്കാര്-സര്ക്കാര് ഇതര സ്ഥാപനങ്ങളുടെയും പിന്തുണ കമ്പനിക്ക് ലഭിച്ചു. ഇപ്പോൾ യുകെ, കാനഡ, ഫിൻലാൻഡ് തുടങ്ങിയ രാജ്യങ്ങളിലും ഫ്യൂസലേജ് പ്രവർത്തിക്കുന്നുണ്ട്.
പ്രകൃതിദത്തമായ രീതിയിൽ നിർമ്മിക്കുന്ന ജൈവപാത്രങ്ങളുടെ നിർമ്മാണം നടത്തുന്ന സംരംഭമായ ക്വാഡ്രാറ്റിന്റെ സ്ഥാപകൻ ഋഷഭ് സൂരി ആണ് ഫോർബ്സ് അണ്ടർ30 ലിസ്റ്റിൽ ഇടം നേടിയ കേരളത്തിൽ നിന്നുള്ള രണ്ടാമത്തെ സംരംഭകൻ. ഉത്തർപ്രദേശ് സ്വദേശിയാണ് ഋഷഭ് സൂരി. എന്നാൽ കേരളം ആസ്ഥാനമാക്കിയാണ് അദ്ദേഹത്തിന്റെ സംരംഭം പ്രവർത്തിക്കുന്നത്. 2020ലാണ് തിരുവനന്തപുരം കിന്ഫ്ര ഫിലിം ആന്ഡ് ഐടി പാര്ക്കില് വൈക്കോല് ഉപയോഗിച്ച് ജൈവ പ്രകൃതിദത്ത പാത്രങ്ങളുണ്ടാക്കുന്ന സംരംഭം ഋഷഭ് സൂരി ആരംഭിക്കുന്നത്. 2023 മുതൽ ഈ ജൈവപാത്രങ്ങൾ വിപണിയിൽ ലഭ്യമാണ്.
Discussion about this post