ന്യൂഡൽഹി : ഇന്ത്യ-ചൈന ബന്ധം ഇപ്പോൾ പുതിയൊരു ദിശയിലേക്ക് നീങ്ങുകയാണ്. ഇരു രാജ്യങ്ങളും തമ്മിലുള്ള ബന്ധം മെച്ചപ്പെടാൻ കാരണമായത് ചൈനീസ് പ്രസിഡന്റ് ഷി ജിൻപിംഗ് ഇന്ത്യയ്ക്ക് അയച്ച ഒരു രഹസ്യ കത്താണെന്ന് ബ്ലൂംബെർഗ് റിപ്പോർട്ട് ചെയ്യുന്നു. മാർച്ചിൽ, യുഎസ് പ്രസിഡന്റ് ട്രംപ് ചൈനയ്‌ക്കെതിരായ വ്യാപാര യുദ്ധം ശക്തമാക്കിയപ്പോൾ ആണ് ഷി ജിൻപിംഗ് ഇന്ത്യൻ
പ്രസിഡന്റ് ദ്രൗപതി മുർമുവിന് ഒരു രഹസ്യ കത്ത് നൽകിയത് എന്നാണ് ബ്ലൂംബെർഗ് റിപ്പോർട്ട് സൂചിപ്പിക്കുന്നത്.
ഇന്ത്യൻ പ്രസിഡണ്ട് ഈ കത്ത് പിന്നീട് പ്രധാനമന്ത്രി നരേന്ദ്രമോദിക്ക് കൈമാറുകയായിരുന്നു എന്നും റിപ്പോർട്ട് പരാമർശിക്കുന്നു. ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നതിനുള്ള സാധ്യതകൾ ആരാഞ്ഞു കൊണ്ടായിരുന്നു ഷി ജിൻപിംഗ് ഇന്ത്യൻ രാഷ്ട്രപതിക്ക് കത്തയച്ചിരുന്നത്. ഈ കത്ത് ലഭിച്ച ഏതാനും മാസങ്ങൾക്ക് ശേഷമാണ് പ്രധാനമന്ത്രി നരേന്ദ്രമോദി ചൈന സന്ദർശിക്കാൻ തയ്യാറായത് എന്നും ബ്ലൂംബെർഗ് റിപ്പോർട്ടിൽ പരാമർശിക്കുന്നുണ്ട്.
ഇന്ത്യയും യുഎസും തമ്മിൽ ഉണ്ടാക്കുന്ന കരാറുകൾ തങ്ങൾക്ക് വലിയ തിരിച്ചടിയാകുമെന്ന് ചൈന ഭയപ്പെട്ടിരുന്നു. ഇതോടെയാണ് ഇന്ത്യയുമായുള്ള എല്ലാ അസ്വാരസ്യങ്ങളും അവസാനിപ്പിച്ച് വീണ്ടും കൂട്ടുകൂടാൻ ചൈന ശ്രമം തുടങ്ങിയത്. ബന്ധം മെച്ചപ്പെടുത്തുന്നതിനുള്ള ബീജിംഗിന്റെ ശ്രമങ്ങൾക്ക് ഒരു പ്രവിശ്യാ ഉദ്യോഗസ്ഥൻ നേതൃത്വം നൽകുമെന്നും ഷിയുടെ കത്തിൽ പരാമർശിച്ചിരുന്നു എന്നാണ് റിപ്പോർട്ട് വ്യക്തമാക്കുന്നത്.
Discussion about this post