ഓപ്പറേഷൻ സിന്ദൂറിന് ശേഷം പാകിസ്താനിൽ നിന്ന് ഡ്രോണുകൾ ഉപയോഗിച്ചുള്ള ആയുധക്കടത്തിൽ വർദ്ധനവ്; ബിഎസ്എഫ്

ഓപ്പറേഷൻ സിന്ദൂറിന് ശേഷം പാകിസ്താനിൽ നിന്നുള്ള ഡ്രോണുകൾ ഉപയോഗിച്ച് ആയുധങ്ങൾ വർഷിക്കുന്നത് വർദ്ധിച്ചെന്ന് ബിഎസ്എഫ്. അതിർത്തി മേഖലയിൽ നിന്ന് വലിയ അളവിൽ ആയുധങ്ങളും വെടിക്കോപ്പുകളും സേന കണ്ടെടുത്തിട്ടുണ്ടെന്ന് ബിഎസ്എഫ് പഞ്ചാബ് ഫ്രോണ്ടിയർ ഇൻസ്‌പെക്ടർ ജനറൽ അതുൽ ഫുൽസെലെ പറഞ്ഞു.

ഈ വർഷം വിവിധതരത്തിലുള്ള ഇരുനൂറിലധികം ആയുധങ്ങൾ കണ്ടെടുത്തു. ഇവയിൽ ഭൂരിഭാഗവും പിസ്റ്റളുകളും ചിലത് എകെ-47 റൈഫിളുകളുമാണ്. ആയുധങ്ങൾ കൂടാതെ 265 മാഗസിനുകൾ, 3625 വെടിയുണ്ടകൾ, 10 കിലോ സ്‌ഫോടക വസ്തുക്കൾ, 12 ഗ്രനേഡുകൾ എന്നിവയും ഈ വർഷം ബിഎസ്എഫ് കണ്ടെടുത്തു. അതിർത്തി കടന്നെത്തിയ 272 ഡ്രോണുകൾ ബിഎസ്എഫ് പിടിച്ചെടുത്തു. ആയുധങ്ങൾ കൂടാതെ 367.788 കിലോ ഹെറോയിൻ, 19,033 കിലോ മാരക ലഹരിമരുന്നായ മെത്താംഫെറ്റമിൻ, 14.437 കിലോ കറുപ്പ് എന്നിവയും കണ്ടെടുത്തു. 251 ഇന്ത്യക്കാരെയും, 18 പാകിസ്താൻ പൗരന്മാരെയും, 3 ബംഗ്ലാദേശ് പൗരന്മാരെയും, 4 നേപ്പാൾ പൗരന്മാരെയും പഞ്ചാബ് ഫ്രോണ്ടിയർ ബിഎസ്എഫ് പിടികൂടിയിട്ടുണ്ട്. നുഴഞ്ഞുകയറാൻ ശ്രമിച്ച 3 പാകിസ്താനികളെ വധിച്ചുവെന്നും ബിഎസ്എഫ് പഞ്ചാബ് ഫ്രോണ്ടിയർ ഇൻസ്‌പെക്ടർ ജനറൽ അതുൽ ഫുൽസെലെ വ്യക്തമാക്കി.

ഓപ്പറേഷൻ സിന്ദൂറിനു ശേഷം പാക്ക് ഭീകരർ 72 കേന്ദ്രങ്ങൾ അതിർത്തിയിൽ നിന്ന് ഏറെ ഉള്ളിലേക്കു മാറ്റി സ്‌ഥാപിച്ചെന്ന് ബിഎസ്‌എഫ് ഇന്നലെ വ്യക്തമാക്കിയിരുന്നു.  മെയ് 7 മുതൽ 10 വരെ നീണ്ട ഏറ്റുമുട്ടലുകൾക്കു ശേഷം നിലവിൽ വന്ന വെടിനിർത്തൽ ധാരണ ബിഎസ്എഫ് പാലിക്കുന്നുണ്ടെന്നും അതിർത്തി കടന്നുള്ള സൈനിക നടപടി പുനരാരംഭിക്കാൻ കേന്ദ്രസർക്കാർ തീരുമാനിച്ചാൽ ശത്രുവിന് ഇതിലും കനത്ത നഷ്ടം വരുത്താൻ സേന തയാറാണെന്നും ബിഎസ്എഫ് ചൂണ്ടിക്കാട്ടിയിരുന്നു.