അഭിഷേകിന്റെ പ്രചോദനം, ഇഷാന്റെ ചിരി; ഇന്ത്യൻ ക്യാമ്പിലെ തകർപ്പൻ ‘ഹഡിൽ’ വീഡിയോ വൈറൽ

2026 ടി20 ലോകകപ്പിലെ നിർണ്ണായകമായ സൂപ്പർ-8 പോരാട്ടത്തിൽ ദക്ഷിണാഫ്രിക്കയെ നേരിടാൻ ഒരുങ്ങുന്ന ഇന്ത്യൻ ടീമിന് ആവേശം പകർന്ന് യുവ ഓപ്പണർ അഭിഷേക് ശർമ്മ. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന പരിശീലനത്തിനിടെ സഹതാരങ്ങൾക്ക് നൽകിയ ‘പെപ്പ് ടോക്കും’ അതിനിടയിലെ രസകരമായ നിമിഷങ്ങളുമാണ് ഇപ്പോൾ ചർച്ചയാകുന്നത്.

സൂപ്പർ-8 ലെ ആദ്യ മത്സരത്തിന് മുന്നോടിയായി ഇന്ത്യൻ താരങ്ങൾ ഒത്തുചേർന്ന ‘ടീം ഹഡിലിൽ’ അഭിഷേക് ശർമ്മ നടത്തിയ പ്രസംഗത്തിന്റെ വീഡിയോ ബിസിസിഐ പുറത്തുവിട്ടു. തുടർച്ചയായ മൂന്ന് ഡക്കുകൾ വഴങ്ങി ഫോമില്ലായ്മയിൽ നിൽക്കുമ്പോഴും അഭിഷേകിന്റെ ആത്മവിശ്വാസത്തിന് ഒരു കുറവുമില്ലെന്ന് തെളിയിക്കുന്നതായിരുന്നു അദ്ദേഹത്തിന്റെ വാക്കുകൾ.

“നമ്മൾ ഒരു ചാമ്പ്യൻ ടീമാണ്. പരസ്പരമുള്ള പ്രകടനങ്ങൾ ആസ്വദിക്കുക എന്നതാണ് ഇപ്പോൾ നമ്മൾ ചെയ്യുന്ന ഏറ്റവും മികച്ച കാര്യം. നമ്മൾ ഇവിടെ വന്നത് എല്ലാ മത്സരങ്ങളും ജയിക്കാനാണ്,” അഭിഷേക് ആവേശത്തോടെ പറഞ്ഞു. പ്രസംഗം അവസാനിപ്പിച്ചത്  ഉച്ചത്തിലുള്ള പഞ്ചാബി മുദ്രാവാക്യത്തോടെയായിരുന്നു.

അഭിഷേകിന്റെ വൈകാരികമായ പ്രസംഗം കേട്ട് തൊട്ടടുത്ത് നിന്നിരുന്ന ഓപ്പണിംഗ് പാർട്ണർ ഇഷാൻ കിഷൻ ചിരിയടക്കാൻ പാടുപെടുന്നത് വീഡിയോയിൽ വ്യക്തമാണ്. അഭിഷേക് സീരിയസായി സംസാരിക്കുമ്പോൾ ഇഷാന്റെ മുഖത്തെ ഭാവങ്ങൾ ആരാധകർക്കിടയിൽ വലിയ ചിരി പടർത്തിയിട്ടുണ്ട്. ഇരുവരും തമ്മിലുള്ള അടുത്ത സൗഹൃദമാണ് ഈ രസകരമായ നിമിഷത്തിന് പിന്നിലെന്നാണ് ആരാധകർ പറയുന്നത്.

2024-ൽ ഒരു മത്സരം പോലും തോൽക്കാതെ ലോകകിരീടം ചൂടിയ ഇന്ത്യ, ഇത്തവണയും ആ റെക്കോഡ് ആവർത്തിക്കാനുള്ള തയ്യാറെടുപ്പിലാണ്. നിലവിൽ ഗ്രൂപ്പ് എ-യിൽ ഒന്നാമന്മാരായി എത്തുന്ന ഇന്ത്യ ഇതുവരെ തോൽവി അറിഞ്ഞിട്ടില്ല.

Look at Ishan kishan’s face, when Abhishek is giving the pep talk. 😂 pic.twitter.com/zm1tLzUyjZ

— Gangadhar (@gangadhar_11) February 20, 2026