ന്യൂഡൽഹി : ഇന്ത്യ-കാനഡ വ്യാപാര കരാറുമായി ബന്ധപ്പെട്ട ചർച്ചകൾ അന്തിമമാകുന്നു. ഫെബ്രുവരി 26 ന് കാനഡ പ്രധാനമന്ത്രി മാർക്ക് കാർണി ഇന്ത്യ സന്ദർശിക്കും. വ്യാപാരം, ഊർജ്ജം, സാങ്കേതികവിദ്യ, പ്രതിരോധ പങ്കാളിത്തം എന്നിവയിൽ ഇന്ത്യയുമായി സുപ്രധാന കരാറുകൾക്കുള്ള ചർച്ചകളാണ് കാനഡ പ്രധാനമന്ത്രിയുടെ സന്ദർശനത്തിന്റെ പ്രധാന അജണ്ട. കാനഡയുടെ പ്രധാനമന്ത്രി സ്ഥാനത്ത് എത്തിയതിനുശേഷം മാർക്ക് കാർണിയുടെ ആദ്യ ഇന്ത്യ സന്ദർശനമാണിത്.
ഇന്ത്യ സന്ദർശനത്തിന്റെ ഭാഗമായി പ്രധാനമന്ത്രി കാർണി ആദ്യം മുംബൈ സന്ദർശിക്കും. തുടർന്ന് അദ്ദേഹം ന്യൂഡൽഹി സന്ദർശിക്കുകയും പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തുകയും ചെയ്യും. 2024-ൽ ഇന്ത്യ കാനഡയുടെ ഏഴാമത്തെ വലിയ ചരക്ക് സേവന വ്യാപാര പങ്കാളിയായിരുന്നു. കനേഡിയൻ സർക്കാരിന്റെ കണക്കനുസരിച്ച് ഇരു രാജ്യങ്ങളും തമ്മിലുള്ള ഉഭയകക്ഷി വ്യാപാരം ഏകദേശം 31 ബില്യൺ ഡോളറായിരുന്നു. 2030-ഓടെ വ്യാപാരം 70 ബില്യൺ ഡോളറായി വർദ്ധിപ്പിക്കാൻ ആണ് ഇരു രാജ്യങ്ങളും പദ്ധതിയിടുന്നത്.
