ചെന്നൈയിലെ ചെപ്പോക്ക് സ്റ്റേഡിയത്തിൽ ആവേശം അണപൊട്ടിയൊഴുകുന്നു. ടി20 ലോകകപ്പിലെ നിർണ്ണായക പോരാട്ടത്തിൽ സിംബാബ്വെ ടോസ് നേടി ഇന്ത്യയെ ബാറ്റിംഗിനയച്ചു. മലയാളി താരം സഞ്ജു സാംസൺ പ്ലേയിംഗ് ഇലവനിലേക്ക് തിരിച്ചെത്തിയെന്ന വാർത്ത സ്റ്റേഡിയത്തെ അക്ഷരാർത്ഥത്തിൽ പ്രകമ്പനം കൊള്ളിച്ചു.
ടോസ് നേടിയ സിംബാബ്വെ ക്യാപ്റ്റൻ സിക്കന്ദർ റാസ ഇന്ത്യയെ ബാറ്റിംഗിന് ക്ഷണിക്കുകയായിരുന്നു. എന്നാൽ ടോസിനേക്കാളുപരി ചെന്നൈയിലെ ആരാധകരെ ആവേശത്തിലാക്കിയത് ഇന്ത്യൻ ക്യാപ്റ്റൻ സൂര്യകുമാർ യാദവ് പ്രഖ്യാപിച്ച ടീം മാറ്റങ്ങളാണ്.
ആരാധകർ കാത്തിരുന്ന ആ പ്രഖ്യാപനം വന്നു. റിങ്കു സിംഗിന് പകരം സഞ്ജു സാംസൺ പ്ലേയിംഗ് ഇലവനിൽ ഇടംപിടിച്ചു. സഞ്ജു തന്നെയായിരിക്കും ഇന്ന് ഇന്ത്യയുടെ വിക്കറ്റ് കീപ്പർ എന്ന് സൂര്യകുമാർ യാദവ് സ്ഥിരീകരിച്ചതോടെ ചെപ്പോക്ക് സ്റ്റേഡിയം ആർത്തലച്ചു. സഞ്ജുവിന്റെ പേര് അനൗൺസ് ചെയ്തപ്പോൾ ഉണ്ടായ ആ ‘ഗർജ്ജനം’ ചെന്നൈക്ക് സഞ്ജുവിനോടുള്ള ഇഷ്ടം ഒരിക്കൽ കൂടി തെളിയിച്ചു.
ടീമിലെ രണ്ടാമത്തെ മാറ്റമായി വൈസ് ക്യാപ്റ്റൻ അക്സർ പട്ടേൽ പ്ലേയിംഗ് ഇലവനിലേക്ക് തിരിച്ചെത്തി. വാഷിംഗ്ടൺ സുന്ദറിന് പകരമാണ് അക്സർ ടീമിൽ ഇടം നേടിയത്. ചെന്നൈയിലെ സ്പിൻ പിച്ചിൽ അക്സറും -വരുൺ ചക്രവർത്തിയും ചേരുന്ന സ്പിൻ ത്രയം സിംബാബ്വെയ്ക്ക് വലിയ വെല്ലുവിളിയാകും.
ഐപിഎൽ 2026-ൽ സഞ്ജു സാംസൺ ചെന്നൈ സൂപ്പർ കിംഗ്സ് ജേഴ്സിയിൽ കളിക്കാനൊരുങ്ങുന്നതിന് മുമ്പ് താരത്തിന് കിട്ടിയ ഈ സ്വീകരണം മലയാളി താരത്തിന് പ്രചോദനം ആകും.
