മുംബൈ : കനേഡിയൻ പ്രധാനമന്ത്രി മാർക്ക് കാർണി നാല് ദിവസത്തെ ഔദ്യോഗിക സന്ദർശനത്തിനായി ഇന്ത്യയിലെത്തി. മുൻ പ്രധാനമന്ത്രി ജസ്റ്റിൻ ട്രൂഡോയുടെ കാലത്ത് വഷളായ ഉഭയകക്ഷി ബന്ധം പുനസ്ഥാപിക്കുക എന്ന ലക്ഷ്യത്തോടെയാണ് കനേഡിയൻ പ്രധാനമന്ത്രിയുടെ നാല് ദിവസത്തെ ഇന്ത്യാ സന്ദർശനം. ഇന്ത്യയുടെ സാമ്പത്തിക കേന്ദ്രമായ മുംബൈയിൽ നിന്നാണ് കനേഡിയൻ പ്രധാനമന്ത്രി ഇന്ത്യ സന്ദർശനത്തിന് തുടക്കം കുറിക്കുന്നത്. പ്രത്യേക പ്രതിനിധി സംഘവും അദ്ദേഹത്തോടൊപ്പം ഉണ്ട്.
ആദ്യ രണ്ട് ദിവസങ്ങളിൽ കോർപ്പറേറ്റ് ഇടപാടുകളിലും നിക്ഷേപ ചർച്ചകളിലും ആണ് കനേഡിയൻ സംഘം ചർച്ചകൾ നടത്തുക. തുടർന്ന് മാർച്ച് 1-2 തീയതികളിൽ കനേഡിയൻ പ്രധാനമന്ത്രിയും സംഘവും ന്യൂഡൽഹിയിലേക്ക് എത്തുകയും പ്രധാനമന്ത്രി നരേന്ദ്രമോദി ഉൾപ്പെടെയുള്ളവരുമായി ചർച്ചകൾ നടത്തുകയും ചെയ്യും. വ്യാപാരം, ഊർജ്ജം, നിർണായക ധാതുക്കൾ, കൃഷി, വിദ്യാഭ്യാസം, നവീകരണം, ജനങ്ങൾ തമ്മിലുള്ള ബന്ധങ്ങൾ എന്നിവ ഉൾക്കൊള്ളുന്ന ഇന്ത്യ-കാനഡ തന്ത്രപരമായ പങ്കാളിത്തത്തിന്റെ സമഗ്രമായ അവലോകനമാണ് അജണ്ടയിൽ ഉള്ളതെന്ന് ഇന്ത്യൻ വിദേശകാര്യമന്ത്രാലയം വ്യക്തമാക്കി.
