2026 ടി20 ലോകകപ്പ് ഫൈനലിൽ ന്യൂസിലൻഡിനെതിരെ ഇന്ത്യ വിജയം ഉറപ്പിച്ച അവസാന ഓവറുകളിൽ അഹമ്മദാബാദിലെ നരേന്ദ്ര മോദി സ്റ്റേഡിയം സാക്ഷ്യം വഹിച്ചത് അതീവ രസകരമായ കാഴ്ചകൾക്കാണ്. മത്സരത്തിന്റെ പിരിമുറുക്കം ഒഴിഞ്ഞതോടെ ഇന്ത്യൻ താരങ്ങൾ മൈതാനത്ത് ആഘോഷം തുടങ്ങിയിരുന്നു. ഇതിനിടയിലാണ് വിക്കറ്റ് കീപ്പർ ബാറ്റർ ഇഷാൻ കിഷൻ ക്യാപ്റ്റൻ സൂര്യകുമാർ യാദവിനോട് ബൗളിംഗ് ചോദിച്ചുകൊണ്ടുള്ള ആംഗ്യങ്ങൾ കാട്ടി ആരാധകരെ ചിരിപ്പിച്ചത്.
ബാറ്റിംഗിൽ 25 പന്തിൽ 54 റൺസുമായി തകർപ്പൻ പ്രകടനം പുറത്തെടുത്ത ഇഷാൻ കിഷൻ ബൗണ്ടറി ലൈനിന് സമീപം ഫീൽഡ് ചെയ്യുമ്പോഴാണ് ഗാലറിയിൽ നിന്ന് ആരാധകർ ആവേശത്തോടെ വിളിച്ചുപറഞ്ഞത്: “ഇഷാന് ബൗളിംഗ് നൽകൂ!” (Ishan ko bowling do!). ഇത് കേട്ട ഇഷാൻ ഉടൻ തന്നെ ദൂരെ നിന്നിരുന്ന ക്യാപ്റ്റൻ സൂര്യകുമാറിന്റെ ശ്രദ്ധ ക്ഷണിച്ചു. ഗാലറിയിലെ ആരാധകർ പറയുന്നത് കേൾക്കണമെന്നും തനിക്ക് പന്ത് നൽകണമെന്നും ആംഗ്യത്തിലൂടെ അദ്ദേഹം ആവശ്യപ്പെട്ടു.
ക്യാപ്റ്റന്റെ ശ്രദ്ധ കിട്ടിയതോടെ ഇഷാൻ തന്റെ ബൗളിംഗ് ആക്ഷൻ അനുകരിച്ചു കാണിക്കുകയും ബൗൾ ചെയ്യാൻ താൻ റെഡിയാണെന്ന് തമാശരൂപേണ അറിയിക്കുകയും ചെയ്തു. സാധാരണയായി ഇന്ത്യയ്ക്കോ ഐപിഎല്ലിലോ ബൗൾ ചെയ്യാത്ത ഇഷാന്റെ ഈ കുസൃതി കണ്ടു സൂര്യകുമാറും ഗാലറിയും ഒരുപോലെ ചിരിച്ചുപോയി. ഇതിന്റെ വീഡിയോകൾ ‘വാട്ട് എ ക്യാരക്ടർ’ എന്ന ക്യാപ്ഷനോടെയാണ് സോഷ്യൽ മീഡിയയിൽ വൈറലാകുന്നത്.
ഈ ലോകകപ്പ് ഇഷാൻ കിഷന്റെ കരിയറിലെ ഏറ്റവും വലിയ തിരിച്ചുവരവുകൂടിയാണ്. ഇന്നിംഗ്സുകളിൽ നിന്ന് 193.29 സ്ട്രൈക്ക് റേറ്റിൽ 317 റൺസ്. ഏറ്റവും കൂടുതൽ റൺസ് നേടിയ നാലാമത്തെ താരം.
