കെ.എൽ. രാഹുലിന്റെ കരിയറിന്റെ തുടക്കത്തിൽ താൻ നൽകിയ ഒരു ഉപദേശം അദ്ദേഹത്തെ അല്പം പ്രകോപിപ്പിച്ചിരുന്നുവെന്ന രസകരമായ വെളിപ്പെടുത്തലുമായി മുൻ ഇന്ത്യൻ താരം റോബിൻ ഉത്തപ്പ. കർണാടക രഞ്ജി ടീമിലും തദ്ദേശീയ ലീഗുകളിലും ഒന്നിച്ചു കളിച്ച അനുഭവങ്ങൾ പങ്കുവെക്കവെയാണ് ഉത്തപ്പ ഈ കാര്യം വ്യക്തമാക്കിയത്.
കരിയറിന്റെ തുടക്കത്തിൽ രാഹുൽ വളരെ മെലിഞ്ഞ ശരീരപ്രകൃതിയുള്ള ആളായിരുന്നുവെന്നും മുപ്പതടി വട്ടക്കെട്ടിന് പുറത്തേക്ക് പന്ത് ശക്തിയോടെ അടിച്ചകറ്റാൻ താരം പ്രയാസപ്പെട്ടിരുന്നുവെന്നും ഉത്തപ്പ ഓർത്തെടുത്തു. അന്നത്തെ രാഹുലിന്റെ ബാറ്റിങ് കണ്ടാണ് പവർ ഹിറ്റിങ് മികവ് മെച്ചപ്പെടുത്തണമെന്ന് താൻ ഉപദേശിച്ചതെന്നും, ആ ഉപദേശം കേട്ട് അന്ന് രാഹുലിന് വിഷമവും ദേഷ്യവും തോന്നിയതായി പിന്നീട് തന്നോട് പറഞ്ഞുവെന്നും ഉത്തപ്പ വെളിപ്പെടുത്തി.
എന്നാൽ ആ വാശി മനസ്സിൽ വെച്ചുകൊണ്ട് രാഹുൽ തന്റെ പവർ ഗെയിമിൽ കഠിനാധ്വാനം നടത്തുകയും ഇന്ന് ലോകത്തിലെ ഏത് മൈതാനത്തിന് പുറത്തേക്കും പന്തെത്തിക്കാൻ ശേഷിയുള്ള ബാറ്ററായി മാറുകയും ചെയ്തുവെന്ന് അദ്ദേഹം പ്രശംസിച്ചു.
തുടക്കകാലത്ത് സൺറൈസേഴ്സ് ഹൈദരാബാദിനായി കളിക്കുമ്പോൾ ടി20 ശൈലിയിലേക്ക് രാഹുൽ പൂർണ്ണമായും രൂപപ്പെട്ടിരുന്നില്ലെന്നും 2016-ൽ റോയൽ ചലഞ്ചേഴ്സ് ബംഗളൂരുവിലെത്തിയതോടെയാണ് അദ്ദേഹത്തിലെ യഥാർത്ഥ പ്രഹരശേഷി ലോകം കണ്ടതെന്നും ഉത്തപ്പ കൂട്ടിച്ചേർത്തു. പരമ്പരാഗത രീതിയിൽ ക്രിക്കറ്റ് പഠിച്ച് പിന്നീട് ആധുനിക ട്വന്റി20 യുഗത്തിലേക്ക് സ്വയം മാറി ചിന്തിക്കുക എന്നത് എളുപ്പമുള്ള കാര്യമായിരുന്നില്ല.
എന്നാൽ കരിയറിലെ നായകസ്ഥാനം രാഹുലിലെ ബാറ്റർക്ക് അല്പം തിരിച്ചടിയായെന്നാണ് ഉത്തപ്പയുടെ നിരീക്ഷണം. പഞ്ചാബ് കിങ്സിനെയും ലഖ്നൗ സൂപ്പർ ജയന്റ്സിനെയും നയിക്കുമ്പോൾ നായകത്വത്തിന്റെ അമിതഭാരം അദ്ദേഹത്തിന്റെ സ്വാഭാവിക ആക്രമണ ബാറ്റിങ് ശൈലിയെ ബാധിച്ചിരുന്നുവെന്നും ഐപിഎല്ലിലെ അദ്ദേഹത്തിന്റെ സ്ട്രൈക്ക് റേറ്റിൽ അത് പ്രതിഫലിച്ചിരുന്നതായും ഉത്തപ്പ വിലയിരുത്തി.
