2026 ടി20 ലോകകപ്പിൽ ഇന്ത്യയെ ലോകകിരീടത്തിലേക്ക് നയിച്ച മലയാളി താരം സഞ്ജു സാംസൺ തന്റെ വിജയത്തിന് പിന്നിലെ യഥാർത്ഥ നായികയെ ലോകത്തിന് പരിചയപ്പെടുത്തി. ഫൈനലിൽ ന്യൂസിലൻഡിനെ തകർത്ത് ഇന്ത്യ ചാമ്പ്യന്മാരായതിന് പിന്നാലെ, തന്റെ ഭാര്യ ചാരുലത രമേശിന് ഹൃദയസ്പർശിയായ കുറിപ്പാണ് സഞ്ജു ഇൻസ്റ്റാഗ്രാമിൽ പങ്കുവെച്ചത്. തന്നെക്കാൾ കൂടുതൽ ഈ നിമിഷത്തിനായി ആഗ്രഹിച്ചതും സ്വപ്നം കണ്ടതും ചാരുവാണെന്ന് സഞ്ജു കുറിച്ചു.
വിജയാഘോഷങ്ങൾക്കിടയിൽ ചാരുലതയ്ക്കൊപ്പമുള്ള ചിത്രവും തങ്ങളുടെ പഴയൊരു ചിത്രവും ചേർത്തുവെച്ചാണ് സഞ്ജു കുറിപ്പ് പങ്കുവെച്ചത്. “നിന്നെ കണ്ടുമുട്ടിയ അന്ന് മുതൽ ഇന്നുവരെ… എന്റെ ജീവിതത്തിൽ എപ്പോഴും കൂടെ നിന്നതിന് നന്ദി. ലോകത്തിന് മുൻപിൽ ഞാൻ എന്തായിരുന്നപ്പോഴും എന്നെ സ്നേഹിച്ചതിനും എന്നോട് സത്യസന്ധത കാണിച്ചതിനും നന്ദി. എന്റെ ഏറ്റവും നല്ല വശവും ഏറ്റവും മോശം വശവും നീ കണ്ടിട്ടുണ്ട്, എന്നിട്ടും നീ എനിക്കൊപ്പം ഉറച്ചുനിന്നു. ക്രിക്കറ്റ് എന്റെ ജീവിതത്തിൽ എത്രത്തോളം വലുതാണെന്ന് മനസ്സിലാക്കിയതിനും നീയും അതിനെ അത്രത്തോളം സ്നേഹിച്ചതിനും നന്ദി. നന്ദി എന്റെ പ്രിയപ്പെട്ട പൊണ്ടാട്ടി…” സഞ്ജു കുറിച്ചു.
2024-ൽ ലോകകപ്പ് നേടിയ ഇന്ത്യൻ ടീമിലും സഞ്ജു അംഗമായിരുന്നു. എന്നാൽ 2026-ൽ ഇന്ത്യ സ്വന്തം മണ്ണിൽ കിരീടം നിലനിർത്തുമ്പോൾ ടീമിന്റെ നട്ടെല്ലായി മാറാൻ സഞ്ജുവിന് സാധിച്ചു. ഫൈനലിൽ 46 പന്തിൽ നിന്ന് 5 ഫോറും 8 സിക്സറുമടക്കം 89 റൺസാണ് സഞ്ജു അടിച്ചുകൂട്ടിയത്. ഇതോടെ ഇന്ത്യ 255 റൺസ് എന്ന കൂറ്റൻ സ്കോറിലെത്തുകയും 96 റൺസിന് വിജയിച്ച് മൂന്നാം ലോകകിരീടം ചൂടുകയും ചെയ്തു. ടൂർണമെന്റിലുടനീളം 80.25 ശരാശരിയിൽ 321 റൺസ് നേടിയ സഞ്ജുവിനെയാണ് ‘പ്ലെയർ ഓഫ് ദി ടൂർണമെന്റ്’ ആയി തിരഞ്ഞെടുത്തത്.
പുരസ്കാരം സ്വീകരിച്ച ശേഷം താൻ സച്ചിൻ ടെണ്ടുൽക്കറുമായി നിരന്തരം സംസാരിക്കാറുണ്ടായിരുന്നു എന്ന് സഞ്ജു വെളിപ്പെടുത്തി. ടീമിന് പുറത്തിരുന്ന സമയത്ത് മാനസികമായി എങ്ങനെ തയ്യാറെടുക്കണമെന്ന് സച്ചിൻ സാറാണ് തനിക്ക് പറഞ്ഞുതന്നതെന്നും സഞ്ജു പറഞ്ഞു.
View this post on Instagram
