ഗാന്ധിനഗർ : ഇന്ത്യൻ പതാകയേന്തിയ മറ്റൊരു എണ്ണ ടാങ്കർ കൂടി സുരക്ഷിതമായി രാജ്യത്ത് എത്തിച്ചേർന്നു. 80,800 മെട്രിക് ടൺ ക്രൂഡ് ഓയിൽ വഹിച്ചുകൊണ്ട് ഇന്ത്യൻ എണ്ണക്കപ്പൽ ജഗ് ലാഡ്കി ആണ് ബുധനാഴ്ച തീരത്തെത്തിയത്. ഗുജറാത്തിലെ മുന്ദ്ര തുറമുഖത്ത് ആണ് ജഗ് ലാഡ്കി എത്തിയത്.
യുണൈറ്റഡ് അറബ് എമിറേറ്റ്സിൽ നിന്നുമാണ് ജഗ് ലാഡ്കി യാത്ര തിരിച്ചിരുന്നത്. 2026 മാർച്ച് 14 ന് യുഎഇയിലെ ഫുജൈറ തുറമുഖത്തിന് നേരെ ഇറാൻ ആക്രമണം നടന്നപ്പോൾ ഫുജൈറയിലെ സിംഗിൾ പോയിന്റ് മൂറിംഗിൽ നിന്നും ക്രൂഡ് ഓയിൽ കയറ്റുകയായിരുന്നു ജഗ് ലാഡ്കി. സംഘർഷത്തെ തുടർന്ന് മേഖലയിൽ കുടുങ്ങിപ്പോയ ഇന്ത്യൻ എണ്ണക്കപ്പൽ പിന്നീട് കേന്ദ്രസർക്കാരിന്റെ നയതന്ത്ര ഇടപെടലിനെ തുടർന്ന് ഞായറാഴ്ച ഇന്ത്യയിലേക്ക് യാത്ര തിരിക്കുകയായിരുന്നു. ശിവാലിക്, നന്ദാ ദേവി എന്നീ കപ്പലുകൾക്ക് ശേഷം, സംഘർഷബാധിത പ്രദേശത്ത് നിന്ന് സുരക്ഷിതമായി ഇന്ത്യയിൽ എത്തിച്ചേർന്ന ഇന്ത്യൻ പതാക വഹിച്ച മൂന്നാമത്തെ കപ്പൽ ആണ് ജഗ് ലാഡ്കി.
