ലഖ്നൗ : ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ മാതാവിനെതിരെ അധിക്ഷേപകരമായ പരാമർശം നടത്തിയ ബിഹാർ സ്വദേശിയായ പുരോഹിതൻ അറസ്റ്റിൽ. ഉത്തർപ്രദേശ് സ്പെഷ്യൽ ടാസ്ക് ഫോഴ്സ് (STF) ആണ് പ്രതിയെ അറസ്റ്റ് ചെയ്തത്. ബിഹാറിലെ പുർണിയയിൽ നിന്നാണ് മുഹമ്മദ് ഫൈസൽ എന്ന മൗലവിയെ യുപി പോലീസ് പിടികൂടിയത്.
കഴിഞ്ഞ ആഴ്ച നടന്ന ഒരു മതപരമായ ചടങ്ങിൽ സംസാരിക്കവെയാണ് മുഹമ്മദ് ഫൈസൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥിനും അദ്ദേഹത്തിന്റെ മാതാവിനുമെതിരെ അങ്ങേയറ്റം അധിക്ഷേപകരവും പ്രകോപനപരവുമായ ഭാഷയിൽ സംസാരിച്ചത്. ഈ പ്രസംഗത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുകയും വലിയ പ്രതിഷേധങ്ങൾക്ക് കാരണമാവുകയും ചെയ്തിരുന്നു. തുടർന്ന് ലഖ്നൗവിലെ സൈബർ ക്രൈം പോലീസ് സ്റ്റേഷനിൽ ലഭിച്ച പരാതിയുടെ അടിസ്ഥാനത്തിൽ ഐടി ആക്ട്, വിവിധ മതവിഭാഗങ്ങൾക്കിടയിൽ സ്പർദ്ധ വളർത്തൽ തുടങ്ങിയ വകുപ്പുകൾ പ്രകാരം ഇയാൾക്കെതിരെ കേസെടുത്തു.
അന്വേഷണം ഏറ്റെടുത്ത യുപി എസ്.ടി.എഫ് പ്രതിയുടെ ഒളിത്താവളം ബിഹാറിലാണെന്ന് കണ്ടെത്തി. തുടർന്ന് ബിഹാർ പോലീസിന്റെ സഹായത്തോടെ പുർണിയ ജില്ലയിലെ ഒരു ഗ്രാമത്തിൽ നടത്തിയ റെയ്ഡിലാണ് മുഹമ്മദ് ഫൈസൽ പിടിയിലായത്. പ്രതിയുടെ ഫോണും ലാപ്ടോപ്പും പോലീസ് പിടിച്ചെടുത്തു. സോഷ്യൽ മീഡിയ വഴിയുള്ള വിദ്വേഷ പ്രചാരണങ്ങളിൽ ഇയാൾക്ക് മുൻപും പങ്കുണ്ടോ എന്ന് പരിശോധിക്കുന്നുണ്ട്. പ്രതിയെ പുർണിയ കോടതിയിൽ ഹാജരാക്കി ട്രാൻസിറ്റ് റിമാൻഡ് വാങ്ങി ഉത്തർപ്രദേശിലേക്ക് കൊണ്ടുവന്നു.
