വാഷിംഗ്ടൺ : ഇറാൻ തലസ്ഥാനമായ ടെഹ്‌റാനിൽ അമേരിക്ക നടത്തിയ അതിശക്തമായ മിസൈൽ ആക്രമണത്തിൽ ഇറാനിയൻ സൈനിക നേതൃത്വത്തിലെ പ്രമുഖർ കൊല്ലപ്പെട്ടതായി അമേരിക്കൻ പ്രസിഡന്റ് ഡൊണാൾഡ് ട്രംപ്. ട്രൂത്ത് സോഷ്യലിൽ പങ്കുവെച്ച ഒരു പോസ്റ്റിലൂടെയാണ് ട്രംപ് ഇക്കാര്യം വെളിപ്പെടുത്തിയത്. രാജ്യത്തെ തെറ്റായ രീതിയിൽ നയിച്ച സൈനിക തലവൻമാരെ ‘വകവരുത്തി’ എന്ന് ട്രംപ് തന്റെ പോസ്റ്റിൽ വ്യക്തമാക്കി.
ടെഹ്‌റാനിലെ സ്ഫോടനങ്ങളുടെ ദൃശ്യങ്ങൾ പങ്കുവെച്ചുകൊണ്ടായിരുന്നു ട്രംപിന്റെ ട്രൂത്ത് സോഷ്യൽ പോസ്റ്റ്. “ഇറാനെ തെറ്റായ വഴിയെ നയിച്ച അവിടുത്തെ സൈനിക നേതൃത്വത്തിലെ പലരും ഈ കൂറ്റൻ പ്രഹരത്തോടെ ഇല്ലാതായിരിക്കുന്നു. ഇതിനൊപ്പം മറ്റ് പലതും തകർക്കപ്പെട്ടിട്ടുണ്ട്,” എന്നും ട്രംപ് കുറിച്ചു. കഴിഞ്ഞ ദിവസം ഇറാൻ ഭരണകൂടത്തിന് ട്രംപ് നൽകിയ കടുത്ത മുന്നറിയിപ്പിന് തൊട്ടുപിന്നാലെയാണ് ഈ സൈനിക നീക്കം നടന്നത്. “ഹോർമുസ് കടലിടുക്ക് തുറന്നു കൊടുക്കുകയോ അല്ലെങ്കിൽ സമാധാന കരാറിന് തയ്യാറാവുകയോ ചെയ്തില്ലെങ്കിൽ നരകം ഇറാനു മേൽ പെയ്തിറങ്ങും” എന്നായിരുന്നു ട്രംപിന്റെ ഭീഷണി.
