ഇൻസ്റ്റാഗ്രാം റീൽസുകളിലും സോഷ്യൽ മീഡിയയിലും ഇപ്പോൾ തരംഗമായി മാറിക്കൊണ്ടിരിക്കുകയാണ് ‘ധുരന്ധർ 2’ (Dhurandhar 2) എന്ന ചിത്രത്തിലെ പിന്ദ (Pinda) എന്ന കഥാപാത്രം. “ഘർ കി യാദ് നഹി ആയി തുജെ ജസ്സി” എന്ന ഡയലോഗിനൊപ്പം തന്നെ പ്രേക്ഷകരെ ഏറെ ആകർഷിച്ചത് ചിത്രത്തിൽ മയക്കുമരുന്ന് ഇടപാടുകൾക്കായി ഉപയോഗിക്കുന്ന വിചിത്രമായ പേരുകളാണ്. മന്ദാകിനി, സാജൻ, ഖർഗോഷ്, ലൊലിപോപ്പ് എന്നിങ്ങനെ കേൾക്കുമ്പോൾ കൗതുകം തോന്നുന്ന ഈ പേരുകൾ വെറും സിനിമാ തിരക്കഥയിലെ ഭാവനയല്ലെന്നും മറിച്ച് പഞ്ചാബിലെ ലഹരി മാഫിയകൾക്കിടയിൽ സജീവമായ രഹസ്യ കോഡുകളാണെന്നും വെളിപ്പെടുത്തിയിരിക്കുകയാണ് നാർക്കോട്ടിക് വിദഗ്ധർ.
പോലീസിന്റെയും അന്വേഷണ ഏജൻസികളുടെയും കണ്ണുവെട്ടിക്കാനാണ് ഇത്തരം ‘കോഡ്’ ഭാഷകൾ മയക്കുമരുന്ന് സംഘങ്ങൾ ഉപയോഗിക്കുന്നത്. ഇതിൽ ഓരോ പേരിനും പിന്നിൽ ഓരോ ലഹരിവസ്തുക്കളുണ്ട്. ‘മന്ദാകിനി’ എന്നത് ഗുണനിലവാരം കുറഞ്ഞ ഹെറോയിൻ അഥവാ സ്മാക്കിനെ (Smack) വിളിക്കുന്ന പേരാണ്. 80-കളിലെ പ്രശസ്ത ബോളിവുഡ് നടി മന്ദാകിനിയുടെ പേരിൽ നിന്നാണ് ഇത് ഉത്ഭവിച്ചത്. അധോലോക നായകൻ ദാവൂദ് ഇബ്രാഹിമുമായി നടിക്കുണ്ടായിരുന്നതായി പറയപ്പെടുന്ന ബന്ധമാണ് ഇത്തരമൊരു പേര് ഈ ലഹരിമരുന്നിന് വരാൻ കാരണം. ‘സാജൻ’ എന്നത് കോക്കെയ്നെയാണ് സൂചിപ്പിക്കുന്നത്. പ്രിയപ്പെട്ടവൻ എന്നർത്ഥമുള്ള ഈ വാക്ക് ഉയർന്ന വരുമാനക്കാരുടെ ഇടയിലുള്ള ‘ലക്ഷ്വറി’ ഡ്രഗ് എന്ന നിലയിലാണ് കോക്കെയ്നെ വിശേഷിപ്പിക്കുന്നത്. ഇതിൽ തന്നെ ഉയർന്ന ഗുണനിലവാരമുള്ള കോക്കെയ്നെ ‘ദുബായ് ഡാഷിംഗ്’ എന്നും ഗുണനിലവാരം കുറഞ്ഞതിനെ ‘ചിക പൗഡർ’ (Chika Powder) എന്നും ഇവർ വിളിക്കുന്നു.
മുയൽ എന്നർത്ഥമുള്ള ‘ഖർഗോഷ്’ എന്നത് പെട്ടെന്ന് കിക്ക് നൽകുന്ന സിന്തറ്റിക് ഡ്രഗ്ഗുകളെ സൂചിപ്പിക്കാനാണ് ഉപയോഗിക്കുന്നത്. എൽഎസ്ഡി (LSD) പോലുള്ള ലഹരിവസ്തുക്കളെ ‘ലൊലിപോപ്പ്’ എന്ന് വിളിക്കുന്നു. കുട്ടിക്കാലത്തെയും മധുരപലഹാരത്തെയും ഓർമ്മിപ്പിക്കുന്ന പേരാണെങ്കിലും അങ്ങേയറ്റം അപകടകരമായ ഹാലുസിനോജനുകളെയാണ് ഇത് പ്രതിനിധീകരിക്കുന്നത്. ‘ചംചം’ എന്ന ബംഗാളി മധുരപലഹാരത്തിന്റെ പേരും ഇവർക്കിടയിൽ പ്രചാരത്തിലുണ്ടെങ്കിലും അത് ഏത് ലഹരിവസ്തുവിനെയാണ് സൂചിപ്പിക്കുന്നതെന്ന് പലപ്പോഴും വിദഗ്ധർക്ക് പോലും തിരിച്ചറിയാൻ കഴിഞ്ഞിട്ടില്ല. ഓരോ ദിവസവും പുതിയ കോഡുകൾ ലഹരി മാഫിയകൾ നിർമ്മിച്ചുകൊണ്ടിരിക്കുകയാണെന്നും സിനിമയിലെ ഈ ഡീറ്റെയിലിംഗ് പഞ്ചാബിലെ യഥാർത്ഥ ലഹരി പശ്ചാത്തലത്തെയാണ് വരച്ചുകാട്ടുന്നതെന്നും വിദഗ്ധർ ചൂണ്ടിക്കാട്ടുന്നു
